გონიოელები: თუ მიწას არ დაგვიბრუნებენ, ნებისმიერ პოლიტიკურ ძალას შევეკვრებით [ვიდეო]

გონიოს მოსახლეობა, რომლებიც ბოლო 5 დღეა ბათუმის მერიასთან ღამისთევით საპროტესტო აქციებს მართავდნენ, დღეს აჭარის მთავრობის ადმინისტრაციულ შენობასთან გადაინაცვლეს. იქ შეკრებილები აცხადებდნენ, რომ ბათუმის მერიისა და საკრებულოს ხელმძღვანელობამ მათ არავითარი ყურადღება არ მიაქცია, ამიტომ იძულებული არიან აჭარის მთავრობას მიმართონ დასახმარებლად.

საპროტესტო აქციის დაწყების ეტაპზე ბათუმის საკრებულომ დაანონსა, რომ გონიოს მიწების საკითხზე იმსჯელებდა 21 ივნისის შესაბამისი კომისიის სხდომაზე. უფრო მეტიც, ოფიციალიურად განაცხადეს, რომ საკრებულოს კომისია გააბათილებდნენ იმ დოკუმენტს, რის საფუძველზეც გონიოელებს მიწა ჩამოართმვეს.

მაგრამ გუშინ საკრებულოს საკუთრების უფლების აღიარების კომისიის სხდომა ისე გადაიდო, რომ არც საპროტესტო აქციის მონაწილეებისთვის და არც მედიისთვის არავითარი განმარტება არ გაკეთებულა. მოსახლეობა ამბობს, რომ შეურაცხყოფილია ბათუმის ხელმძღვანელობის მათთდამი დამოკიდებულებით.

ბათუმის საკრებულოსა და მერიის არც ერთი მოხელე [საკრებულოში თავისუფალი დემოკრატების  წარმომადგენლის, კობა ჩხეიძის გარდა] არც დღეს გამოჩენილა მათ ადმინისტრაციულ შენობასთან შეკრებილი მოსახლეობისთვის განმარტების გასაკეთებლად.

საპროტესტო მსვლელობაზე აქციის ლიდერი მოსახლეობას მოუწოდებდა, რომ არ დაშლილიყვნენ, ასევე ითქვა იმაზეც, რომ თუ აჭარის მთავარობაც ისევე მოექცევა, როგორც ბათუმის ხელისუფლება, ისინი ნებისმიერ პოლიტიკურ ძალას შეეკვრებიან თავიანთი საკუთრების – მიწის დასაბრუნებლად.

გონიოს მოსახლეობა, დაახლოებით 300-მდე ოჯახი ლამის ერთი ათეული წელია იბრძვის მათთვის ჩამორთმეული მიწების დასაბრუნებლად, მაგრამ ამ მოქალაქეების მოთხოვნების შესრულებას, როგორც ჩანს, არც ეს ხელისუფლება აპირებს.