სასამართლოს მიერ უპატრონოდ ცნობილ „პობედას“ აჭარის ფინანსთა და ეკონომიკის სამინისტრო აუქციონზე 5 000 ლარად ყიდის. ვაჭრობის ბიჯი 200 ლარია. ელექტრონული აუქციონი დაწყებულია და 2023 წლის 15 აგვისტოს დასრულდება.
აუქციონის მიხედვით, „ბათუმის საქალაქო სასამართლოს სამოქალაქო საქმეთა კოლეგიის 2022 წლის 17 მაისის გადაწყვეტილებით, „უპატრონოდ იქნა ცნობილი და აჭარის ავტონომიურ რესპუბლიკას საკუთრებაში გადაეცა მექანიკური სატრანსპორტო საშუალება – ავტომანქანა „გაზ 20 პობედა“ (ძარა: 79246, ძრავა: LJ 38864, შასი: 108144, გამოშვების წელი 1953, ფერი: ყავისფერი 1/8).“
გასაყიდად გამოტანილი „პობედა“ / ფოტო აუქციონიდან
„სატრანსპორტო საშუალებაში არსებული ძრავა (LJ38864) წარმოადგენს არა ,,გაზ 20“-ის, არამედ სხვა მარკა მოდელის სატრანსპორტო საშუალების ძრავას.
სატრანსპორტო საშუალებას სამინისტროს მფლობელობაში გადმოსვლამდე (2009 წელი) შეუცვალეს ძრავა, ხოლო აღნიშნული ცვლილება არ არის კანონით დადგენილი წესის შესაბამისად რეგისტრირებული, ავტომანქანის ე.წ. ტექპასპორტში მითითებულია შეცვლამდე არსებული ძრავას ნომერი.
ამასთან, არ არსებობს ინსპექტირების ცენტრის მიერ გაცემული, გადაკეთებული მექანიკური სატრანსპორტო საშუალების ინსპექტირების ანგარიში, სატრანსპორტო საშუალება არის არამუშა მდგომარეობაში, არ იქოქება და ძრავა არ მუშაობს. შესაბამისად, შეუძლებელია სატრანსპორტო საშუალების წარდგენა ინსპექტირების ცენტრში მუშა და გამართულ მდგომარეობაში ინსპექტირების პროცედურების ჩასატარებლად.
აღნიშნულის გამო სატრანსპორტო საშუალების აჭარის ავტონომიური რესპუბლიკის ფინანსთა და ეკონომიკის სამინისტროს საკუთრებად აღრიცხვის პროცედურები შეუძლებელი ხდება.
სამინისტრო არ იღებს პასუხისმგებლობას ავტოსატრანსპორტო საშუალების დადგენილი წესით რეგისტრაციის პროცედურების განხორციელების თაობაზე“, – აღნიშნულია აუქციონზე გამოტანილი „პობედის“ აღწერილობაში.
გასაყიდად გამოტანილი „პობედა“ / ფოტო აუქციონიდან
ეს არ არის პირველი „პობედა“, რომელსაც აჭარის ფინანსთა და ეკონომიკის სამინისტრო ყიდის. სამინისტრომ 2019 წელს აუქციონზე გატანილი კიდევ ერთი „პობედა“ 4800 ლარად გაყიდა.:
შავი „პაბედა“ და რუხი „პიკაპი“ – აჭარის ქონება აუქციონზე იყიდება
