პარტია „დროას“ ინფორმაციით, მათი პარტიის ბათუმის ორგანიზაციის ხელმძღვანელს გენრი დოლიძეს დაკავების დროს და დაკავების შემდეგაც პოლიციელებმა სცემეს. ის სენაკის დაკავების იზოლატორშია გადაყვანილი.
გენრი დოლიძის ინტერესებს საია იცავს.
საიას ბათუმის ორგანიზაციის ხელმძღვანელის, თამარ წულუკიძის ინფორმაციით, ის უკვე მოინახულა ადვოკატმა და ადასტურებს, რომ გენრის დაზიანებები აქვს:
„გენრი ამბობს, რომ დაზიანებები არამხოლოდ დაკავების დროს, არამედ გადაყვანის დროსაც მიაყენეს.“
რუსული გემის შემოსვლის წინააღმდეგ ბათუმში გამართულ აქციაზე 23 მოქალაქე დააკავეს, მათ შორის ორი უკრაინის მოქალაქეა. ოთხი დაკავებულის ვინაობა და ადგილსამყოფელი კი ჯერ ისევ არ ვიცით.
დაკავებულებს სახელმწიფო [მუხლი 166-ე] წვრილმან ხულიგნობას და [მუხლი 173-ე] პოლიციისადმი დაუმორჩილებლობას ედავება.
საიას ინფორმაციით, რომელიც დაკავებულების ინტერესებს იცავს, ამ დრომდე სასამართლოსთვის არ გადაუციათ საქმის მასალები. შესაბამისად, ჩანიშნული არ არის სასამართლო პროცესები.
დაკავებული 23 პირიდან უმეტესობას უკვე შეხვდა ადვოკატი და ისინი ადასტურებენ, რომ რამდენიმე მათგანს დაზიანებები აღენიშნება.
ბათუმის პორტში საპროტესტო აქციაზე დაკავებულებს შორის არის ბექა გრიგორიადისი, ლაზარე გრიგორიადისის მამა. ასევე დეპუტატ ლევან ანთაძის შვილი – ილია ანთაძე, გიორგი გველესიანი, ირაკლი ხარჩილავა, ირაკლი მეტრეველი, ლუკა წულაძე, მიშა აბზიანიძე, რევაზ მიქელაძე, გიგა შალიკაძე, მირიან ჯალაბაძე, ლადო ჩიბურდანიძე, რამაზ გიორგაძე, დიმიტრი ზერვესკი, გიორგი სანაძე, ბადრი ფუტკარაძე, ავთანდილ დოლიძე.
დაკავებულებს შორის ორი ქალია, ერთი უკრაინის მოქალაქეა – მარინა ჩობონიანი. ასევე დაკავებულია არასამთავრობო ორგანიზაცია „ალტერნატივას“ ხელმძღვანელი ხათუნა ბერიძე.
გარდა ამისა, საიას თავმჯდომარის თქმით, არსებობს კადრები, სადაც ჩანს, როგორ აკავებენ მოქალაქეს, რომელიც მარტო იდგა და არაფერს აშავებდა: „საინტერესოა, რა საფუძვლით შეადგინეს ოქმი.“
