უკრაინის თავდაცვის მინისტრის მოადგილის, ანა მალიარის თქმით, სამხრეთ ფრონტზე და ბახმუტის მიმართულებით უკრაინის შეიარაღებულ ძალებს მნიშვნელოვანი წინსვლა აქვთ.
მალიარმა დღეს, 24 ივლისს, განაცხადა, რომ გასულ კვირას (17-დან 23 ივლისამდე) უკრაინელმა სამხედროებმა სამხრეთ ფრონტზე 12 კვადრატულ კილომეტრზე მეტი და ბახმუტის მიმართულებით კიდევ 4 კვადრატული კილომეტრი გაათავისუფლეს.
მისი თქმით, უკრაინის ჯარები აგრძელებენ შეტევით ოპერაციებს რამდენიმე სექტორში მელიტოპოლისა და ბერდიანსკის მიმართულებით. საერთო ჯამში, შეტევის დროს სამხრეთ ფრონტზე უკვე გათავისუფლებულია 192 კვადრატულ კილომეტრზე მეტი ტერიტორია.
ბახმუტის მიმართულებით კი საკვანძო ბრძოლები გრძელდება კლეშჩიევკას, ანდრეევკასა და კურდიუმოვკას მიდამოებში. შეტევის დროს უკრაინის არმიამ იქ დაახლოებით 35 კვადრატული კილომეტრი ტერიტორია უკვე გაათავისუფლა.
24 ივლისს, დილით, უკრაინის შეიარაღებული ძალების გენერალურმა შტაბმა გაავრცელა ინფორმაცია, რომ რუსი დამპყრობლები ცდილობდნენ დაიბრუნონ დაკარგული პოზიციები სამხრეთში, ხოლო აღმოსავლეთში 35 შეტაკება მოხდა ხუთი მიმართულებით.
