შპს „სმარტ დეველოპმენტი“ ბათუმში, ადლიის დასახლება „მინდაში“, მრავალფუნქციური კომპლექსის მშენებლობას გეგმავს. სამშენებლო მიწის ნაკვეთი 9 745 კვ.მეტრია და კერძო სახლებით განაშენიანებულ ტერიტორიაზეა.
კომპანია კ2 კოეფიციენტის გაზრდას ითხოვს, სანაცვლოდ მერიას ნამატი ფართობის 5 პროცენტს ან იმავე ფართობის საბაზრო ღირებულების თანხას, ან სხვა ტერიტორიაზე ფართობების გადაცემას სთავაზობს.
გასულ კვირას საკრებულომ ამ პროექტის განაშენიანების დეტალური გეგმა დაამტკიცა ისე, რომ დაზუსტებით ვერ გავიგეთ ზემოთ ჩამოთვლილთაგან კონკრეტულად რაზე შეუთანხმდა კომპანია მერიას. არადა ამ საკითხით საკრებულოს სხდომაზე ენმ-ის ფრაქციის თავმჯდომარე, ნოდარ დუმბაძეც დაინტერესდა.
მერიის ურბანული პოლიტიკისა და ქალაქმშენებლობის სამსახურის უფროსის, მამუკა რამიშვილის ინფორმაციით, კომპანია მერიას კომპენსაციის სახით იმავე უბანში საბავშვო ბაღის მშენებლობას და ნამატი ფართობის ხუთი პროცენტის გადაცემასაც სთავაზობს.
პროექტი სამი ბლოკისგან შედგება და გენგეგმის მიხედვით 10, 12 და 16-სართულიან შენობებს ითვალისწინებს. დამკვიდრებული პრაქტიკის მიხედვით, ნებართვის გაცემისას ან შემდეგ ცვლილებით შენობების სიმაღლე შეიძლება გაიზარდოს.
შპს „სმარტ დეველოპმენტის“ 51 პროცენტი გოჩა ქობულაძის საკუთრებაა, კომპანიის 49 პროცენტს კი რუსეთის მოქალაქე ნიკოლაი იაკოვენკო ფლობს.
იმავე სხდომაზე ზღვასთან ახლოს დაგეგმილი კიდევ ერთი სამშენებლო პროექტის კონცეფცია განიხილეს. თამარის დასახლებაში შპს „გრინ ქეიფ რეზიდენსი“ მრავალბინიანი საცხოვრებელი კორპუსის მშენებლობას გეგმავს. კომპანია კოეფიციენტის გაზრდას ითხოვს, შესაბამისად, მას კვარტლის განაშენიანების გეგმის მომზადებაც მოუწევს.
ბათუმი , თამარ მეფის გამზირი 62ა
შპს „გრინ ქეიფ რეზიდენსს“ ჯემალ ირემაძე ფლობს.
საკრებულომ კიდევ ერთი პროექტის განაშენიანების დეტალური გეგმა დაამტკიცა. კერძოდ, ბათუმის საფეხბურთო სტადიონთან, ბაგრატიონის #135-ში შპს „ჯი. არ. აი“ მრავალფუნქციური კომპლექსის მშენებლობას გეგმავს. კოეფიციენტის გაზრდას ეს კომპანიაც ითხოვს 7.0-მდე. სამშენებლო მიწის ნაკვეთი 7 727 კვ.მეტრია.
ბათუმის მერიის ინფორმაციით, კომპანია აპირებს გაზრდილი კოეფიციენტით მიღებული ფართობის 10 % მუნიციპალიტეტის საბინაო ფონდს გადასცეს. ეს ქალაქისთვის კანონით დადგენილი ერთგვარი კომპენსაციაა: კოეფიციენტის გადამეტების შემთხვევაში კომპანია ვალდებულია სხვაობით მიღებული ფართობის 10 პროცენტი, ბინების სახით, მერიას გადასცეს.
კოეფიციენტის გაზრდა კომპანიას საშუალებას აძლევს, კონკრეტულ ზონაში დადგენილზე მაღალი შენობა ააშენოს. შესაბამისად, მეტი ფართობი და მეტი სარგებელი მიიღოს.
სხდომებზე დამტკიცებული საკითხების მიხედვით, საკრებულომ დაამტკიცა ყველა ინიციატივა, რომელიც მერიამ კ2 კოეფიციენტის გაზრდის მოთხოვნით წარადგინა.
ამით მომავალში მერიასთან ერთად საკრებულოც პირდაპირ იღებს პასუხისმგებლობას ქალაქის განაშენიანებასა და მასთან დაკავშირებულ გამოწვევებზე.
გამოწვევები კი ბევრია:
ქაოსური განაშენიანება, არასაკმარისი პარკინგი და გამწვანება. კორპუსები მხოლოდ მცირე ზომის ეზოებით, ან პროექტები ეზოების გარეშე და ასე შემდეგ.
ოპოზიცია მსგავს გადაწყვეტილებებს ძირითადად არ ეთანხმება.
გასულ სხდომაზე საკრებულოს წევრმა აკაკი გვიანიძემ მერიის ურბანული პოლიტიკისა და ქალაქმშენებლობის სამსახურის უფროსს ჰკითხა, რისთვის არის დადგენილი კ2 კოეფიციენტი კონკრეტულ ზონაში.
მომხსენებელმა მას განუმარტა და კანონით დადგენილ რეგულაციებზე მიუთითა. საკრებულოს წევრის კითხვა რიტორიკული იყო, ის „ბათუმელებთან“ ამბობს, რომ იმის ჩვენება სურდა, თუ როგორ აქცია მერიამ ტენდენციად ის, რაც გამონაკლისი უნდა იყოს.
კანონი კონკრეტულ ზონაში კონკრეტულ კოეფიციენტს ადგენს და იქვე აწესებს გამონაკლის შემთხვევებს, როცა კოეფიციენტის გაზრდის შესაძლებლობას უშვებს.
კანონის მიხედვით, განაშენიანების უკვე დადგენილი მაქსიმალური კოეფიციენტის გადამეტება შესაძლებელია განაშენიანების დეტალური გეგმის საფუძველზე, თუ ეს კომპენსირდება სხვა ღონისძიებებით.
ეს შეიძლება იყოს ქალაქთმშენებლობითი განვითარების განსაკუთრებული მიზეზები.
მაგალითად, ურბანული ღირებულების დაცვა და განვითარება, თუ ამას არ დაუპირისპირდება საზოგადოებრივი ინტერესები, არ გამოიწვევს ადამიანთა საცხოვრებელ და სამუშაო გარემოს სანიტარიულ-ჰიგიენური მდგომარეობის გაუარესებას.
