ბათუმში, ფრიდონ ხალვაშის გამზირზე, ავტომანქანების მოძრაობა მთლიანად განახლდა, თუმცა გზაზე პარალელურად მიმდინარეობს სხვადასხვა სარემონტო სამუშაოებიც.
გამზირის რეაბილიტაციაზე კომპანია „ერ ტე დე“-სთან გზების დეპარტამენტს ხელშეკრულება 19 399 999 ლარზე აქვს გაფორმებული. ამ თანხის ნახევარზე ოდნავ მეტი – 9 778 106 ლარი, კომპანიისთვის უკვე გადარიცხულია.
საქართველოს საავტომობილო გზების დეპარტამენტსა და მშენებელ კომპანია „ერ ტე დეს“ შორის გაფორმებული ხელშეკრულებით, ქუჩის სარეაბილიტაციო სამუშაოები, ბოლო ცვლილებით, 31 მაისს უნდა დასრულებულიყო, თუმცა…
„გზის საფარის დაგება ივნისის შუა რიცხვებამდე უნდა დასრულდეს… თუმცა ამინდმა თუ ხელი არ შეგვიწყო, ეს ვადა შესაძლოა ივნისის ბოლომდე გადაიწიოს. გზის დასრულების შემდეგ დაიწყება მისი კეთილმოწყობა – ნიშნები და ასე შემდეგ“, – უთხრეს „ბათუმელებს“ რამდენიმე დღის წინ კომპანია „ერ ტე დეში“.
ხალვაშის გამზირი, რომელიც ბათუმი-ახალციხის ავტომაგისტრალის ნაწილია, პერიოდულად, სხვადასხვა მონაკვეთში, 2023 წლის მაისიდან იყო გადაკეტილი. გზის გახსნის თარიღი გზების დეპარტამენტმა რამდენჯერმე გადაავადა. ბოლო თარიღი 9 ივნისის დილის 8 საათი იყო.
„რამე არ მითხრა, მღალატობს ნერვები“ – რეპორტაჟი ხელვაჩაურის გადათხრილი გზიდან [VIDEO]
