„თავისუფლება ნიკას“, „ჩვენ ვირჩევთ ევროპას“, „მედიასთან ბრძოლას აგებს ხელისუფლება“ – ამ გზავნილებით დღეს, 16 მაისს, ჟურნალისტები და სამოქალაქო ორგანიზაციების წარმომადგენლები ბათუმში, ევროპის მოედანზე შეიკრიბნენ.
აქციაზე შეკრებილებმა ნიკა გვარამიას სოლიდარობა გამოუცხადეს.
ჟურნალისტებისა და სამოქალაქო ორგანიზაციების სოლიდარობის აქცია ბათუმში
ნიკა გვარამია „მთავარი არხის“ დამფუძნებელია. ის ზუსტად ერთი წელია პატიმრობაში იმყოფება. სამოქალაქო საზოგადოების წარმომადგენლები პრეზიდენტ სალომე ზურაბიშვილს მისი შეწყალებისკენ მოუწოდებენ.
„ნიკა გვარამიას თავისუფლების მოძრაობამ“ 27 მაისს, 18:00 საათზე, პრეზიდენტის ადმინისტრაციასთან აქცია დააანონსა.
ნიკა გვარამიას თბილისის საქალაქო სასამართლომ 3 წლითა და 6 თვით პატიმრობა 2022 წლის 16 მაისს შეუფარდა. პროკურატურა გვარამიას ედავებოდა, „რუსთავი 2-ის“ დირექტორობის დროს, სამაუწყებლო კომპანიის „კანონიერი ინტერესების საწინააღმდეგოდ უფლებამოსილების ბოროტად გამოყენებასა და მისი კუთვნილი დიდი ოდენობით თანხის სამსახურებრივი მდგომარეობით გამოყენებას“.
მის დაპატიმრებას კრიტიკა მოჰყვა როგორც ქვეყნის შიგნით, ისე ქვეყნის გარეთ. მათ შორის, გვარამიას პატიმრობას არაერთხელ გამოეხმაურნენ ევროპარლამენტარები. მაგალითად, ევროპარლამენტარ მაიკლ გალერის თქმით, ქვეყნისთვის, რომელიც მიისწრაფვის ევროკავშირისკენ, არ არის ბუნებრივი ჟურნალისტების ციხეში ჩასმა ისეთი ბრალდებებით, რომლებიც „აშკარად შეთითხნილია“.
თბილისის საქალაქო სასამართლოს მოსამართლე ლაშა ჩხიკვაძე გვარამიას საქმეზე განაჩენის გამოცხადების შემდეგ, შეერთებული შტატების საელჩომ აშშ-ში დაგეგმილი პროგრამიდან მოხსნა.
