„ვაგნერის“ დამფუძნებელმა, ევგენი პრიგოჟინმა, 4 მაისს, გვიან ღამით, ვიდეომიმართვა გაავრცელა, სადაც ის პირდაპირ აგინებს რუსეთის თავდაცვის მინისტრ, სერგეი შოიგუსა და გენერალური შტაბის უფროსს – ვალერი გერასიმოვს.
პრიგოჟინის ვიდეომიმართვა ათეულობით დაღუპული, დაქირავებული „ვაგნერელის“ ფონზეა ჩაწერილი. ვიდეო პრიგოჟინის პრესსამსახურმა ტელეგრამში გაავრცელა.
პრიგოჟინის თქმით, რუსეთის ფედერაციის თავდაცვის სამინისტროს საბრძოლო მასალები ნორმის ფარგლებში რომ მიეწოდებინა, მაშინ „ვაგნერის“ დანაკარგები ხუთჯერ ნაკლები იქნებოდა.
„ჭურვების დეფიციტი გვაქვს, 70%. შოიგუ, გერასიმოვ, სად ჯანდაბაშია…. საბრძოლო მასალები?!“ – ყვირის ვიდეოში პრიგოჟინი.
ვიდეოში „პუტინის მზარეულად“ წოდებული პრიგოჟინი რუსი ჩინოვნიკების შვილებსაც ახსენებს, რომლებიც „ძვირადღირებულ კლუბებში“ ერთობიან, იღებენ ვიდეოებს და შემდეგ YouTube-ზე ათავსებენ. მან, სავარაუდოდ, მიანიშნა შოიგუს ქალიშვილზე, რომელიც იანვარში დუბაიში ისვენებდა.
„ფიქრობთ, რომ რადგან თქვენ გაქვთ ჭურვების საწყობი, ამიტომაც გაქვთ ამის უფლება. არის ელემენტარული გათვლა – თუ თქვენ აწვდით ნორმირებულ საბრძოლო მასალებს, ისინი [დაღუპულები] ხუთჯერ ნაკლები იქნებიან. ისინი აქ მოვიდნენ, როგორც მოხალისეები და კვდებიან იმისთვის, რომ თქვენ წითელი ხის კაბინეტებში იცოხნებოდეთ“, – დასძინა „ვაგნერის“ დამფუძნებელმა.
კერძო სამხედრო კომპანია „ვაგნერი“ უკრაინის ქალაქ ბახმუტთან იბრძვის. მისი და რეგულარული არმიის ერთობლივი ძალისხმევით, რუსებმა შეძლეს ქალაქის ცენტრის აღება. ბახმუტისთვის რუსები 8 თვეზე მეტია იბრძვიან და კვლავაც უკრაინის ძლიერ წინააღმდეგობას აწყდებიან. უკრაინისა და აშშ-ის ინფორმაციით, ბოლო რამდენიმე თვეში „ვაგნერს“ დიდი დანაკარგები აქვს.
