ომის შესწავლის ამერიკული ინსტიტუტი (ISW) 3 მაისის ანგარიშში დეტალურად აანალიზებს რუსეთის განცხადებას იმის შესახებ, რომ უკრაინა დრონებით დაესხა თავს კრემლს.
ISW-ის ექსპერტები მიიჩნევენ, რომ დრონებით თავდასხმა კრემლმა დადგა და ამ მოსაზრებას შემდეგი არგუმენტებით ამყარებენ:
რუსეთის ხელისუფლება ბოლო თვეებში მუდმივად აძლიერებს საჰაერო თავდაცვას მოსკოვის ირგვლივ, ამიტომ ნაკლებად სავარაუდოა, რომ ორმა უპილოტო საფრენმა აპარატმა შეძლოს საჰაერო თავდაცვის გარღვევა კრემლთან.
თავდასხმა რომ არ ყოფილიყო დადგმული, ეს სიურპრიზი იქნებოდა რუსეთის ხელისუფლებისთვის და თავდაპირველად ურთიერთსაწინააღმდეგო ახსნა-განმარტებებს შემოგვთავაზებდნენ. ასე მოხდა სამხედრო წარუმატებლობის შემდეგ ბალაქლიასა და ხერსონში.
ამის ნაცვლად მოსკოვმა მაშინვე წარმოადგინა დეტალური ანგარიში და ასეთი სწრაფი რეაქცია აჩვენებს, რომ „შეტევა მომზადდა შიგნით ისე, რომ მოსალოდნელ პოლიტიკურ შედეგებს გადაეწონა სირცხვილი.
ომის შესწავლის ინსტიტუტის ანალიტიკოსები მიიჩნევენ, რომ კრემლზე თავდასხმის მოწყობით რუსეთის ხელისუფლება შეეცადა ქვეყნის მოსახლეობისთვის ეჩვენებინა, რომ ომი ახლოსაა და მასში ყველა უნდა მონაწილეობდეს.
ასევე, კრემლზე თავდასხმის ინსცენირება შეიძლება გახდეს 9 მაისის დღესასწაულების გაუქმების ან ძლიერად შეზღუდვის საბაბი.
ISW-ი უშვებს, რომ ამ შემთხვევას შეიძლება მოჰყვეს რუსეთის სხვა ოპერაციები სხვა დროშის ქვეშ.
