საქართველოს სტატისტიკის ეროვნული სამსახურის ინფორმაციით, ქვეყნის მოსახლეობის რიცხოვნობა 2023 წლის იანვრის მონაცემებით, წინა წელთან შედარებით, გაზრდილია 47 710-ით და არის – 3 736 357 [მათგან კაცი – 1 793 820, ხოლო ქალი – 1 942 537]. მონაცემები არ მოიცავს ოკუპირებულ ტერიტორიებს.
2022 წლის იანვრის მონაცემებით კი, საქართველოს მოსახლეობის რიცხოვნობა 3 688 647 იყო.
იმავე სტატისტიკის სამსახურის მონაცემებით, 2022 წელს, წინა წელთან შედარებით, შემცირებულია როგორც შობადობის, ასევე გარდაცვალების მაჩვენებელიც – 2022 წელს 6 799 ადამიანით მეტი გარდაიცვალა, ვიდრე დაიბადა [დაიბადა 42 319 და გარდაიცვალა 49 118]. ანუ საქართველოში ბუნებრივი მატება არ ყოფილა.
საქსტატის მონაცემებით, 2022 წელს საქართველოდან ემიგრაციაში წავიდა 125 269 ემიგრანტი. 2021 წელს კი – 99 974 ადამიანი.
მაშინ რის ხარჯზე გაიზარდა მოსახლეობის რიცხოვნობა/რაოდენობა ქვეყანაში? – სტატისტიკის ეროვნული სამსახურის განმარტებით, მოსახლეობის რიცხოვნობა ძირითადად გაზარდა მიგრაციის მაჩვენებელმა. 2022 წელს საქართველოში 54 509 მოქალაქით მეტი შემოვიდა, ვიდრე საქართველოდან გავიდა [ამაში შედის, როგორც საქართველოს მოქალაქეები, ასევე უცხოელებიც].
„მოსახლეობის რიცხოვნობაში შედის ყველა – საქართველოს მოქალაქე და ასევე ის უცხოელებიც, რომლებიც 6 თვეზე მეტი ხნით რჩებიან საქართველოში. შესაბამისად, მოსახლეობის რიცხოვნობის ზრდა არ ნიშნავს უშუალოდ საქართველოს მოქალაქეების რაოდენობის მატებას“, – გვითხრეს საქსტატში.
საქართველოს რამდენი მოქალაქე ცხოვრობს დღეს საქართველოში? – საქსტატში გვითხრეს, რომ ასეთი მონაცემი მათ დამუშავებული არ აქვთ.
[red_box]მოსახლეობის მიგრაცია[/red_box]
საქსტატის მონაცემებით, 2022 წელს საქართველოში დაფიქსირდა 179 778 იმიგრანტი და 125 269 ემიგრანტი.
აღსანიშნავია, რომ 2022 წელს, იმ 125 ათასი იმიგრანტთაგან, ვინც საქართველოდან გავიდა, 100 ათასი იყო საქართველოს მოქალაქე. ქვეყანაში კი 54,4 ათასი მოქალაქე დაბრუნდა.
ამავე სტატისტიკის მიხედვით, იგივე 2022 წელს საქართველოში:
- შემოვიდა რუსეთის 62 304 მოქალაქე და გავიდა – 5 935
- შემოვიდა უკრაინის 20 716 მოქალაქე და გავიდა- 2 004
- შემოვიდა ბელარუსის 13 361 მოქალაქე და გავიდა – 852
2022 წელს იმიგრანტებისა და ემიგრანტების სრული რიცხოვნობა სქესისა და მოქალაქეობის მიხედვით ნახეთ ცხრილში:
2022 წლის იანვართან შედარებით 2023 წლის იანვრისთვის გაზრდილია აჭარის მოსახლეობის რაოდენობაც, ჯამში 11 898-ით.
საქსტატის მონაცემებზე დაყრდნობით, აჭარის მოსახლეობის ზრდა ძირითადად დამოკიდებულია მოსახლეობის ზრდაზე ბათუმში [5 440-ით].
ამავე მონაცემებით, გასული წლის იანვართან შედარებით მიმდინარე წლის იანვარში მოსახლეობის რაოდენობა შემცირებულია ქობულეთში [355-ით], შუახევში [85-ით], ქედაში [75-ით]:
მოსახლეობის რაოდენობა აჭარასა და აჭარის მუნიციპალიტეტებში 2022 და 2023 წლების 1-ელი იანვრის მდგომარეობით / წყარო: საქსტატი
- ინფორმაციისთვის: აჭარაში 2000 წელს რეგისტრირებული იყო 352 976 ადამიანი, 1994 წელს კი – 423 000 ადამიანი
ამავე თემაზე:
საქართველოში წელს თავშესაფარი 291-მა უცხოელმა მოითხოვა, გააძევეს – 55
