ბათუმში 28 მარტს ძლიერი ქარის შედეგად დაზიანებულ სახურავებს 16 მისამართზე აღადგენენ, რაშიც ბიუჯეტიდან 562 ათას 84 ლარი დაიხარჯება.
ძლიერმა ქარმა ქალაქში, ჯამში, 221 მრავალბინიანი და კერძო სახლის სახურავი დააზიანა.
დოკუმენტების მიხედვით, სხვა მისამართებზე დაწყებულია მდგომარეობის შესწავლა და დაზარალებულები, არსებული წესის შესაბამისად, ერთჯერად მატერიალურ დახმარებას მიიღებენ.
აღნიშნულ 16 მისამართზე სამუშაოებს მერიის საქალაქო ინფრასტრუქტურისა და კეთილმოწყობის სამმართველო ტენდერის გარეშე შეისყიდის. სამმართველომ შესაბამისი თანხმობის მისაღებად, განაცხადით, შესყიდვების სააგენტოს უკვე მიმართა.
ამ განაცხადის მიხედვით, სახლის სახურავების აღდგენითი სამუშაოები 2023 წლის 1-ელი მაისიდან 9 მაისამდე პერიოდში უნდა ჩატარდეს.
სამმართველოში აცხადებენ, რომ ბათუმის მერიის ავარიული სახლებისა და სტიქიური მოვლენების შედეგად დაზარალებული ოჯახების მდგომარეობის შემსწავლელი მუდმივმოქმედი საბჭოს დავალებით, მათ „მრავალბინიანი საცხოვრებელი სახლების დაზიანებულ სახურავებზე, რომელთა დაზიანების ფართობი აღემატება 40 კვ.მ-ს, მოამზადეს საპროექტო-სახარჯთაღრიცხვო დოკუმენტაცია, 16 მისამართისთვის“.
„ბათუმელები“ დაინტერესდა იგეგმება თუ არა სახურავების გადახურვა სხვა მისამართებზეც.
„მოგვმართეთ წერილობით სახურავების საკითხზე და შესაბამისი სამსახური მოგიმზადებთ პასუხს“, – მოგვწერეს კეთილმოწყობის სამმართველოდან.
„ბათუმელები“ შეეცადა დაეზუსტებინა ასევე, თუ რას ითვალისწინებს „ერთჯერადი მატერიალური დახმარება“ და დაწყებულია თუ არ მისი გაცემა. ამ კითხვებზე პასუხი ქალაქის მერიისდან ვერ მივიღეთ. „წერილობით მოგვმართეთ“, – შეგვატყობინეს მერიიდან.
16 მისამართი და თანხა, რაც სახურავის აღდგენაში უნდა დაიხარჯოს:
ბათუმის მერიის სტიქიური მოვლენების შედეგად დაზარალებული ოჯახების მდგომარეობის შემსწავლელი მუდმივმოქმედი საბჭოს 5 აპრილის სხდომის ოქმის მიხედვით, სულ 221 განცხადება იქნა შესწავლილი.
„მოხსენებითი ბარათების საფუძველზე დგინდება, რომ სტიქიის [ძლიერი ქარი] შედეგად ზიანი ძირითადად მიადგა როგორც კერძო, ასევე მრავალბინიანი საცხოვრებელი სახლების სახურავებს, მთლიანობაში დაზიანდა 65 მრავალბინიანი ბინათმესაკუთრეობის, რომელთაგან დავალებები სარეაბილიტაციო სამუშაოების შესრულებაზე [არსებული გარემოებებიდან გამომდინარე, რიგი მიზეზების გამო] შეიძლება გაიცეს მხოლოდ 58 შემთხვევაზე და 156 კერძო სახლები“, – აღნიშნულია ოქმში.
საბჭოს სხდომის ოქმში ასევე აღნიშნულია, რომ „გამოიკვეთა სახურავების, როგორც მასშტაბური [40 კვ.მ და ზემოთ], ასევე საშუალო [არ აღემატება 40 კვ.მ-ს] და მცირე დაზიანებები.“
„არსებული ვითარების მასშტაბურობიდან გამომდინარე საბჭომ დაისახა რიგი ღონისძიებების განხორციელება… მსჯელობის შედეგად გამოითქვა აზრი, რომ მრავალბინიანი სახლების სახურავებზე განხორციელდეს სარეაბილიტაციო სამუშაოები, რაც გულისხმობს სახურავების აღდგენა-განახლებას, ხოლო კერძო სახლების შემთხვევაში – მიყენებული ზარალის დადგენის შემდგომ, დაზარალებულ ოჯახებზე ერთჯერადად, მატერიალური დახმარების გაწევას, საბჭოს საქმიანობის წესის შესაბამისად.“ – ვკითხულობთ საბჭოს ოქმში.
ამავე თემაზე:
აჭარაში 192 ოჯახი მეწყერსაშიში ზონიდან გაიყვანეს – ეს რიცხვი შესაძლოა გაიზარდოს
