რადიო NV-სთან ინტერვიუში უკრაინის სამხედრო დაზვერვის ხელმძღვანელმა, კირილო ბუდანოვმა განაცხადა, რომ დაზვერვისთვის ცნობილია იმ რუსი ჯარისკაცის ვინაობა, რომელმაც უკრაინელ სამხედრო ტყვეს თავი მოკვეთა.
„დიახ ასეა. … ჩვენ ვიცით, ის ვინ არის“, – განაცხადა ბუდანოვმა რადიო NV-ის კითხვაზე, აქვს თუ არა მონაცემები ამ სამხედრო დანაშაულის ჩამდენის შესახებ.
თავდაცვის სამინისტროს დაზვერვის ხელმძღვანელმა განაცხადა, რომ მის ადგილსამყოფელს არ გაამხელს.
„დავუბრუნდეთ თქვენი შეკითხვის პირველ ნაწილს: სად არის ის და რატომ გეუბნებით, რომ არ შემიძლია გიპასუხოთ. არსებობს ოდნავ განსხვავებული მონაცემებიც – რატომღაც ისე ხდება, რომ ისინი, ყველა, ვინც მსგავსი რამ ჩაიდინა და რაც ჩვენთვის ნათელი გახდა, თითქმის აღარ არსებობენ. ამიტომ, არა ვფიქრობთ, რომ ეს ადამიანი იქნება გამონაკლისი“, – დასძინა ბუდანოვმა.
კითხვაზე, თუ „დაეხმარა“ ამაში დაზვერვა, თავდაცვის სამინისტროს დაზვერვის ხელმძღვანელმა უპასუხა:
„უბრალოდ, ასე მოხდა“.
მედიის ინფორმაციით, უკრაინის დაზვერვა არ ადასტურებს ამ დანაშაულში „ვაგნერის“ მონაწილეობას.
11 აპრილს რუსულ Telegram არხებზე გავრცელდა ვიდეო, სადაც ოკუპანტებმა, სავარაუდოდ, უკრაინელ ტყვე ჯარისკაცს თავი მოკვეთეს დანით. უკრაინის დაზვერვამ გამოძიება დაიწყო.
უკრაინული მედიის ცნობით, ეს არ არის ერთადერთი მსგავსი ამაზრზენი მტკიცებულება, რომელიც ბოლო დღეებში გამოჩნდა.
10 აპრილს რუსულ სოციალურ ქსელებში გამოაქვეყნეს კადრები, სადაც სავარაუდოდ უკრაინელი სამხედრო მოსამსახურის თავის ქალის ნარჩენები ჩანს. თავის ქალა, რომლის გვერდზეც რუს მებრძოლებს ცელი ჰქონდათ მოთავსებული, დაუზუსტებელ ტერიტორიაზე, სავარაუდოდ, ბახმუტში იყო.
ამერიკული ომის კვლევის ინსტიტუტის [ISW]ს ანალიტიკოსები ასევე აღნიშნავენ, რომ სოციალური ქსელების მომხმარებლებმა ასევე გაიხსენეს 2022 წლის გაზაფხულისა და ზაფხულის შემთხვევები, როდესაც ლუგანსკში, კონკრეტულად კი პოპასნაიაში, თავის ქალები ჰქონდათ სარებზე ჩამოცმული. ეს ტერიტორია „ვაგნერელების“ სამოქმედო ზონა იყო.
