„გენდერული სტერეოტიპები ქალისა და მამაკაცის ურთიერთობების შესახებ“ – ასე ეწოდება კვლევას, რომელიც „ქალთა საინფორმაციო ცენტრმა“ საქართველოს 5 მუნიციპალიტეტში – ქედაში, ბოლნისში, ზუგდიდში, ხარაგაულსა და ხაშურში ჩაატარა.
კვლევაში, სხვა საკითხებთან ერთად, ერთ-ერთი იყო დამოკიდებულება ქორწინებამდე სექსის შესახებ. კვლევაში აღნიშნულია, რომ ქალისა და კაცის ქცევის შეფასება განსხვავებული სტანდარტებით ხდება, რაც კაცისათვის მისაღებია, ქალისათვის დაუშვებელ საქციელად აღიქმება.
„გამოკითხულთა 41% მიიჩნევს, რომ ქორწინებამდე სექსუალური კავშირი ვაჟისათვის დასაშვებია. მხოლოდ 7% მიიჩნევს, რომ ქორწინებამდე სექსუალური კავშირის ქონა დასაშვებია როგორც ქალისთვის, ისე კაცისთვის“ – ნათქვამია კვლევაში.
აქვე ვკითხულობთ, რომ გამოკითხულთა 52%-ს მიაჩნია, რომ ქორწინებამდე სექსუალური გამოცდილების ქონა არც ერთი სქესისთვის არ არის დასაშვები.
კვლევაში ასევე ნათქვამია, რომ ძლიერია სტერეოტიპი, რომ სასიყვარულო ურთიერთობებში კაცი უნდა იყოს უფრო აქტიური:
„სამიზნე მუნიციპალიტეტებში გამოკითხულთა საერთო რაოდენობის უმრავლესობას, კერძოდ, 68%-ს მიაჩნია, რომ სიყვარული კაცმა უნდა აუხსნას ქალს, მხოლოდ 2%-ს მიიჩნია, რომ სიყვარული ქალმა უნდა აუხსნას კაცს. დაახლოებით მესამედი მიიჩნევს, რომ გრძნობების გამჟღავნების შემთხვევაში სქესს მნიშვნელობა არ აქვს“.
კვლევა განხორციელდა „ქალთა საინფორმაციო ცენტრის“ მიერ სამიზნე მუნიციპალიტეტების გენდერული თანასწორობის საბჭოებთან თანამშრომლობით, დანიური ორგანიზაცია KVINFO-სა და დანიის საგარეო საქმეთა სამინისტროს მხარდაჭერით.
კვლევა ჩატარდა 2022 წლის ზაფხულში. გამოყენებულ იქნა როგორც რაოდენობრივი, ისე თვისებრივი მეთოდები: ჩატარდა გამოკითხვა, სიღრმისეული ინტერვიუები და სამაგიდე კვლევა.
________________
ფოტო: Pixels
