მთავარი,სიახლეები

ბათუმში ველობილიკებს ღებავენ

14.04.2023 •
ბათუმში ველობილიკებს ღებავენ

ბათუმში ველობილიკების შეღებვა დაიწყეს. „ბათუმის ავტოტრანსპორტის“ ინფორმაციით, „სამუშაოები დაწყებულია და მშრალი ამინდის პარალელურად, აქტიურ რეჟიმში ხორციელდება“.

„ბათუმელები“ დაინტერესდა, თუ რა ოდენობის თანხაა გამოყოფილი ქალაქში ველობილიკების მოსაწესრიგებლად. „ბათუმის ავტოტრანსპორტის“ ინფორმაციით, ველობილიკებს ორგანიზაციის ბალანსზე არსებული საღებავის მარაგით აწესრიგებენ.

„ამ ეტაპზე განახლდა ველობილიკის ზოლები ასათიანის ქუჩაზე (ფარნავაზ მეფის ქუჩიდან რუსთაველის ქუჩის კვეთამდე), ბაქოს ქუჩაზე (შავშეთის ქუჩის კვეთიდან „ბელუქსის“ შენობის მიმდებარე ტერიტორიამდე). შესაღებად მოსამზადებელი სამუშაოები ჩატარებულია თამარ მეფის გამზირზე, სადაც უახლოეს დღეებში, უნალექო ამინდის პირობებში განახლდება სამუშაოები.

ველობილიკის შეღებვა ითვალისწინებს გზის დარჩენილი, სავალი ნაწილისგან გამყოფი თეთრი კანტების გავლებასაც. შესაბამისად, ყველა მონაკვეთზე, სადაც ველობილიკი განახლდება, შეიღებება გამყოფი ზოლებიც. სამუშაოები იწყება ბილიკის წითელი მონაკვეთის დახაზვით, შემდეგ იღებება თეთრი, გამყოფი ზოლები. ასათიანის ქუჩაზე არსებულ ველობილიკის ნაწილზე გამყოფი ზოლები უკვე დახაზულია, დარჩენილ ნაწილზე კი დაიხაზება სამუშაოების განახლებასთან ერთად“, – მოგვწერეს „ბათუმის ავტოტრანსპორტიდან“.

„ბათუმის ავტოტრანსპორტიდან“ ისიც მოგვწერეს, რომ წელს ქალაქში არსებული ყველა ველობილიკის განახლებაა დაგეგმილი. ბათუმის მერიას ველობილიკები გასულ წელს ცალკეული გამონაკლისის გარდა პრაქტიკულად არ შეუღებია.

ბათუმში ველობილიკების ფართობი სულ 20 ათასი კვ.მეტრია.

გადაბეჭდვის წესი


ასევე: