აჭარაში ახალი პროგრამა – „ორსულ ქალთა და ახალშობილთა მაღალი ხარისხის უწყვეტი მეთვალყურეობა“ ინერგება.
საპილოტე პროგრამის ფარგლებში შეიქმნება ორსულთა და 5 წლამდე ბავშვთა მეთვალყურეობის სტრატეგია. ორსულებისთვის და ახალბედა მშობლებისთვის მომზადდება სპეციალური სახელმძღვანელო, რომელიც დედათა და ბავშვთა უწყვეტი მოვლის ხარისხის გაუმჯობესებას და მშობელთა ცნობიერების ამაღლებას ისახავს მიზნად.
პროგრამის შესახებ ინფორმაციას აჭარის ჯანდაცვის სამინისტრო ავრცელებს. სამინისტროსვე ცნობით, საპილოტე პროგრამის დანერგვაში იაპონიის საერთაშორისო განვითარების სააგენტო – JICA არის ჩართული.
„იაპონიის საერთაშორისო განვითარების სააგენტოს მისიაა ჩამოსული, რომელიც სამი წლის განმავლობაში საქართველოში განახორციელებს ძალიან მნიშვნელოვან პროექტს – ეს გახლავთ დედათა და ბავშვთა ჯანმრთელობის გაძლიერება და ამავდროულად მშობელთა წიგნის დანერგვა.
ეს არ არის უბრალოდ წიგნი, ეს არის რეფორმა, რომელიც ერთ სისტემაში სვამს ლამის ორსულობამდელი პერიოდიდან მეთვალყურეობას ორსულობის პერიოდში, მშობიარობის და შემდგომ ბავშვთა განვითარების ადრეულ და შემდგომ პერიოდებში. ასეთია იაპონიის უნივერსალური, დედათა და ბავშვთა მეთვალყურეობის, განვითარების და მასზე ხარისხობრივი ზედამხედველობის პროგრამა“ – ამბობს ვერა ბაზიარი, საქართველოს ჯანდაცვის სამინისტროს ჯანდაცვის პოლიტიკის დეპარტამენტის დედათა და ბავშვთა ჯანმრთელობის საკოორდინაციო საბჭოს სამდივნოს ხელმძღვანელი.
სამინისტროს ინფორმაციით, JICA-ის წარმომადგენლები იმყოფებოდნენ ვიზიტით აჭარის ყველა იმ დაწესებულებაში, რომლებიც ახორციელებენ ანტენატალურ მეთვალყურეობას ორსულებისა და ასევე, პერინატალურ სერვისებსაც აწოდებენ მათ.
