„ბათუმის სასამართლოს ცენტრალურ შესასვლელთან აალებადი ნივთიერება დაასხა, ცეცხლი წაუკიდა და მიიმალა,“ – ამბობს პროკურორი ნიკა მენთეშაშვილი, რომელსაც დღეს, 31 მარტს, სასამართლო პროცესის შემდეგ ვესაუბრეთ.
მოსამართლე კოტე ჭილაიამ აღკვეთი ღონისძიების სახით პატიმრობა შეუფარდა ბრალდებულ კორნელი ნ-ს. მას პროკურატურა სასამართლოს შენობაზე თავდასხმას ედავება.
შემთხვევა 27 მარტს მოხდა – ბათუმის საქალაქო სასამართლოს შესასვლელს ცეცხლი წაუკიდეს. შემთხვევის შედეგად არავინ დაშავებულა, ცეცხლი კი, სასამართლოს აპარატის თანამშრომლებმა სახანძროს მისვლამდე ჩააქრეს.
კორნელი ნ-ს გამოძიება სისხლის სამართლის კოდექსის 353-ე მუხლის პრიმა ნაწილით ედავება, რაც გულისხმობს „პოლიციელზე, სპეციალური პენიტენციური სამსახურის მოსამსახურეზე ან ხელისუფლების სხვა წარმომადგენელზე, ანდა საჯარო დაწესებულებაზე თავდასხმას“. ბრალის დადასტურების შემთხვევაში, კაცს 4-დან 7 წლამდე თავისუფლების აღკვეთა ელის.
ბრალდებული 58 წლის კაცია, ბათუმში ცხოვრობს, თუმცა მის ადგილსამყოფელს სამართალდამცველები ამ დრომდე ვერ ადგენენ.
„…ის იყო გაღიზიანებული სასამართლოს გადაწყვეტილებით,“ – უთხრა მოსამართლეს პროკურორმა ნიკა მენთეშაშვილმა. პროკურატურის ვერსიით, ბრალდებული უკმაყოფილო იყო ბათუმის საქალაქო სასამართლოს მიერ რამდენიმე თვის წინ მიღებული გადაწყვეტილებით – კორნელი ნ-ს შვილს სამოქალაქო საქმეზე თანხის გადახდა დაეკისრა კონკრეტული კომპანიის სასარგებლოდ.
„შესაბამისი ინფორმაცია არ წარმოუდგენია პროკურორს, რა გაირკვა ბრალდებულის ადგილსამყოფლის შესახებ,“ – მოსამართლეს მიმართა ადვოკატმა გიორგი მახარაძემაც, იგი იურიდიული დახმარების ცენტრის იურისტია და ყურადღება გაამახვილა იმაზე, რომ გამოძიებას არ დაუდგენია, გადაკვეთა თუ არა, მაგალითად, საზღვარი ბრალდებულმა.
„იქნებ რომელიმე კლინიკაშია, ან სხვა რამ მოუვიდა? იყო ასეთი შემთხვევა, დაუკავებიათ თურმე კაცი თბილისში და ინფორმაცია არც პროკურორს ჰქონდა და არც დაცვის მხარეს… შესაძლებელია, მას უბრალოდ ვერ ვუკავშირდებოდეთ და ეს არ ნიშნავს იმას, რომ მიმალვის საფრთხე არსებობს,“ – აღნიშნა ადვოკატმა, გიორგი მახარაძემ.
„ის მაშინვე მიიმალა, რაც აჩვენებს იმას, რომ გაცნობიერებული ჰქონდა, რომ სჩადიოდა კანონით აკრძალულ ქმედებას“, – ადვოკატს მიმართა მოსამართლემ.
ცეცხლის წაკიდება ვიდეოსათვალთვალო კამერას დაუფიქსირებია. ბრალდებული მისივე ოჯახის წევრებმა ამოიცნეს. პროკურორმა პროცესზე ახსენა ისიც, რომ ბრალდებული წარსულში ნასამართლევია საკუთრების წინააღმდეგ ჩადენილ დანაშაულზე, ნასამართლობა გაქარწყლებული აქვს, თუმცა „ეს მეტყველებს მის პიროვნებაზე“, – დასძინა პროკურორმა.
პროკურორ ნიკა მენთეშაშვილის თქმით, ექსპერტიზა დაადგენს, აალებადი ნივთიერება, რამაც სასამართლოში ხანძარი გააჩინა, ნამდვილად ბენზინი იყო თუ არა.
ექსპერტიზა დანიშნულია სასამართლოს შენობის დაზიანებაზეც. პროკურორი ამბობს, რომ ამ კუთხით გამოძიება გრძელდება.