ხულოში, სამთო-სათხილამურო კურორტ გოდერძის ტერიტორიაზე, აჭარის მთავრობა თემატური გამოფენა-ბაზრობის, ავტოსადგურისა და ავტოპარკინგის მოწყობას გეგმავს, რისთვისაც აჭარის ბიუჯეტიდან 4,5 მილიონი ლარია გათვალისწინებული.
ავტოსადგური, პარკინგი, გამოფენა-ბაზრობა კურორტ გოდერძიზე / რენდერები პროექტიდან
შესაბამისი სამუშაოების შესყიდვაზე ტენდერი აჭარის ფინანსთა და ეკონომიკის სამინისტრომ 4 597 900 ლარით გამოაცხადა. ტენდერს თან ახლავს შესაბამისი პროექტები და მშენებლობისთვის თუ სხვადასხვა ინფრასტრუქტურის მოწყობისთვის საჭირო სხვა დოკუმენტაცია.
პირობის თანახმად, სამუშაოები ხელშეკრულების გაფორმების თარიღიდან არაუგვიანეს 2025 წლის 30 ნოემბრის ჩათვლით პერიოდში უნდა დასრულდეს.
ტენდერში წინადადებების მიღება კი 2023 წლის 16 აპრილს დაიწყება და 21 აპრილს დასრულდება.
1-ბაზრობის, 2-პარკინგის, 3-ავტოსადგურის საპროექტო ტერიტორიები კურორტ გოდერძიზე
„პრეტენდენტი უფლებამოსილია წარმოადგინოს 2023-2024 წლებზე გადანაწილებული გეგმა-გრაფიკი, რომლის საფუძველზეც დაკორექტირდება სამუშაოების დასრულების საბოლოო ვადაც“, – აღნიშნულია ტენდერის პირობაში.
ამავე პირობების მიხედვით:
- „2023-2024-2025 წლების აჭარის ბიუჯეტის დაფინანსების ფარგლებში მიმწოდებელი ვალდებულია მოიპოვოს მშენებლობის პროცესში სამშენებლო პროცესის შეუფერხებლად წარმართვისათვის აუცილებელი ყველა სახის სანებართვო ან შეთანხმების დოკუმენტაცია –
[ქუჩის/გზის სავალ ნაწილზე ტრანშეის მოწყობა, დროებითი ელექტრო და წყალმომარაგება, საჭიროების შემთხვევაში ქუჩის გადაკეტვა, საკანალიზაციო და სანიაღვრე არხების დროებით გამოყენება, სამშენებლო ტერიტორიაზე მასალების მიწოდების/გამოტანის სატრანსპორტო სქემის შეთანხმება საჭიროების შემთხვევაში და ა.შ.]
- მიმწოდებელი ვალდებულია სამშენებლო სამუშაოების მიმდინარეობის პერიოდში, უწყვეტ რეჟიმში განახორციელოს სამშენებლო ტერიტორიებზე ონლაინ ვიდეოკონტროლი და მასზე წვდომა მისცეს შემსყიდველს.“
განახლება: ეს ტენდერი არ შედგა. ხელახალი ტენდერის შესახებ ნახეთ ამ ბმულზე.
დიდთოვლობისა თუ უგზოობის, ასევე მეწყრული პროცესების გამო ხულო-გოდერძის გზის მონაკვეთი ხშირად იკეტება და ძირითადად მაღალი გამავლობის ტრანსპორტითაა შესაძლებელი გადაადგილება.
დღეს, 23 მარტის მდგომარეობითაც, საქართველოს საავტომობილო გზების დეპარტამენტის ინფორმაციით, სოფელ ჯვარიქეთთან, კურორტ გოდერძისკენ მიმავალ ავტომაგისტრალზე მოძრაობა მხოლოდ მაღალი გამავლობის ავტომობილებისთვის არის გახსნილი:
წყალი მაგისტრალზე მოედინება – ხულო-ადიგენის გზა სანიაღვრე არხების გარეშე
