ბათუმი,მთავარი,მთიანი აჭარა,სიახლეები

ავარიული 5 სართულის ადგილზე 12 სართულს აშენებენ პროექტით, რომელიც ბათუმის მერიამ დამალა

23.03.2023 • 7124
ავარიული 5 სართულის ადგილზე 12 სართულს აშენებენ პროექტით, რომელიც ბათუმის მერიამ დამალა

ბათუმში, მაიაკოვსკის N3ა-ში მდებარე ავარიულ ხუთსართულიან კორპუსს დაანგრევენ და მის ადგილზე 12-სართულიან კორპუსს ააშენებენ. ახალი კორპუსის პროექტის შესახებ ინფორმაცია „ბათუმელებმა“ მერიისგან იანვრის დასაწყისში მოითხოვა, თუმცა, არც პროექტის ესკიზი გვაჩვენეს და არც ის გვითხრეს, ვინ იმუშავა პროექტზე.

მერიის საქალაქო ინფრასტრუქტურისა და კეთილმოწყობის სამმართველო, აღნიშნულ მისამართზე საცხოვრებელი სახლის მშენებლობის შესყიდვაზე, ამჯერად ბაზრის კვლევას ატარებს.

სამმართველოს მიერ გამოქვეყნებული დოკუმენტების მიხედვით, ახალი კორპუსის პროექტი შედგენილია ტენდერში გამარჯვებულ შპს „ჯორჯიანჰაუსის“ მიერ, რომელთანაც მერიის სამმართველოს ხელშეკრულება 450 ათას ლარზე, 2022 წლის აგვისტოში აქვს გაფორმებული [„ბათუმში, ავარიული სახლების დემონტაჟი-მშენებლობა, გამაგრება-რეაბილიტაციის ფარგლებში, შენობა ნაგებობების სამშენებლო-სარეაბილიტაციო სამუშაოების საპროექტო-სახარჯთაღრიცხვო დოკუმენტაციის შედგენაზე“].

ამ ტენდერის ფარგლებში რამდენი პროექტი შეადგინა კომპანიამ, „ბათუმელებს“ ამ ეტაპზე არ მოუთხოვია, თუმცა, 12-სართულიანი კორპუსის პროექტი და ხარჯთაღრიცხვა, დოკუმენტის მიხედვით, მერიის სამმართველოს 2022 წელსვე ჩაბარდა.

სამმართველოს ინფორმაციით:

აღნიშნული პროექტით მაიაკოვსკის 3ა-ში, ავარიული ხუთსართულიანის ნაცვლად 12-სართულიანი კორპუსი, ხელშეკრულების გაფორმებიდან 16 თვეში უნდა აშენდეს.

მშენებლობაზე გამოცხადდება ელექტრონული ტენდერი, საპროექტო-სახარჯთაღრიცხვო დოკუმენტაციით განსაზღვრული სავარაუდო ღირებულებით – 15 192 786 ლარი.

ამასთან, შესაძლებელი იქნება ავანსის გამოყენება შემსყიდველთან შეთანხმებით, სახელშეკრულებო ჯამური ღირებულების არაუმეტეს 30%-ისა.

ტენდერში, რომელიც სამმართველომ ბაზრის კვლევის დასრულების შემდეგ უნდა გამოაცხადოს, პრეტენდენტთა გამოცდილების მოთხოვნები განსაზღვრულია. მათ შორის:

  • „ტენდერში მონაწილე პრეტენდენტს 2017 წლის 1-ლი იანვრიდან ტენდერის გამოცხადების დღემდე უნდა გააჩნდეს სამოქალაქო ან საზოგადოებრივი დანიშნულების ობიექტ(ებ)ის მშენებლობის ან/და რეკონსტრუქციის ან/და რეაბილიტაციის სამუშაოების შესრულების გამოცდილება ჯამურად არანაკლებ 44 000 000 ლარის ღირებულებით, მათ შორის ობიექტი/პროექტი ერთი ხელშეკრულების ფარგლებში შესრულებული უნდა ჰქონდეს საცხოვრებელი სახლის მშენებლობა სრულად გარემონტებული ე.წ “გასაღებ ქვეშ” (გარდა საყოფაცხოვრებო ავეჯისა), რომელიც მიღებულია ექსპლუატაციაში საერთო ღირებულებით არანაკლებ 13 000 000 ლარის ოდენობით;
  • ტენდერში მონაწილე პრეტენდენტს 2017 წლის 1-ლი იანვრიდან ტენდერის გამოცხადების დღემდე უნდა გააჩნდეს სამოქალაქო ან საზოგადოებრივი დანიშნულების ობიექტ(ებ)ის მშენებლობის გამოცდილება, რომელთა ჯამური სამშენებლო ფართობი შეადგენს არანაკლებ 15 000 კვ.მ.-ს და ერთი ხელშეკრულების ფარგლებში შესრულებული უნდა ჰქონდეს ობიექტი/პროექტი საცხოვრებელი სახლის მშენებლობა სრულად გარემონტებული ე.წ “გასაღებ ქვეშ” (გარდა საყოფაცხოვრებო ავეჯისა), რომელიც მიღებულია ექსპლუატაციაში საერთო სამშენებლო ფართით არანაკლებ 6 000 კვ.მ.“ და სხვ.

მერიის სამმართველო სთხოვს დაინტერესებულ პირებს 2023 წლის 24 მარტის ჩათვლით, წერილობით აცნობონ, „რომ გაქვთ ზემოაღნიშნული გამოცდილება“.

ახალი შენობის რენდერი არც ბაზრის კვლევის დოკუმენტაციას ახლავს, თუმცა აღნიშნულია, რომ შენობის მაქსიმალური სიმაღლე 43.7 მეტრი იქნება, ხოლო საერთო ფართობი – 6 796 კვ.მ

ბათუმში, მაიაკოვსკის N3ა-ში მდებარე ავარიული ხუთსართულიანი კორპუსის შესახებ უფრო დეტალური ინფორმაცია ნახეთ ამ ბმულზე:

 

რისი ეშინიათ ავარიულ კორპუსში მცხოვრებთ ბათუმში და რას პასუხობს მათ მერია

გადაბეჭდვის წესი


ასევე: