24 მარტს ბათუმში, სპორტის სასახლეში, ბათუმის წიგნისა და უმაღლესი განათლების პირველი საერთაშორისო გამოფენა გაიხსნება.
გამოფენის მიზანია წიგნის კითხვის პოპულარიზაცია, საგამომცემლო სექტორის განვითარების ხელშეწყობა და თანამედროვე ტექნოლოგიების გაცნობა. ასევე, დაინტერესებულ პირებს საშუალება ექნებათ, მიიღონ სრული ინფორმაცია სასწავლო პროგრამების, სტიპენდიების, გრანტებისა და სტაჟირების შესახებ.
გამოფენაში მონაწილეობს 40-მდე ადგილობრივი და საერთაშორისო დაწესებულება: უმაღლესი სასწავლებლები, კულტურულ-საგანმანათლებლო ორგანიზაციები და ფონდები, წიგნის სადისტრიბუციო კომპანიები, გამომცემლობები, სტამბები, წიგნის მაღაზიები, ჟურნალ-გაზეთები, ქართული კულტურის ცენტრები, უცხო ენის ცენტრები.
ასევე, გამოფენის ფარგლებში გაიმართება საერთაშორისო კონფერენცია და სხვადასხვა შემეცნებით-გასართობი პროგრამა.
გამოფენ 24 მარტს, დილის 11 საათზე გაიხსნება, 26 მარტის ჩათვლით გაგრძელდება და მასზე დასწრება თავისუფალია. გამოფენის სამუშაო გრაფიკია:
- 24 მარტი 11:00-18:00 საათი
- 25 მარტი 10:00-18:00 საათი
- 26 მარტი 10:00-16:00 საათი
გამოფენაზე ქართული გამომცემლობები ახალ წიგნებსა და ბესტსელერებს წარადგენენ.
„სულაკაურის გამომცემლობა“ აანონსებს, რომ მკითხველებს მათ სტენდთან არაერთი ახალი თუ ბესტსელერი წიგნი დახვდებათ როგორც ქართული, ისე თარგმნილი და საბავშვო ლიტერატურიდან.
გამომცემლობის ცნობით, წიგნების შეძენა განსაკუთრებული ფასდაკლებით იქნება შესაძლებელი. „გარდა ამისა, სტანდარტულ ფასდაკლებასთან ერთად TBC-ის სტუდენტის ან მოსწავლის ბარათების მფლობელები 30%-იანი ქეშბექითაც ისარგებლებთ“ – წერს „სულაკაურის გამომცემლობა“.
გამოფენის წიგნების კატალოგი შეგიძლიათ ნახოთ აქ.
გარდა ამისა, „სულაკაურის გამომცემლობა“ ბათუმელ მკითხველს გამომცემლობის ცნობილ ავტორებთან სთავაზობს შეხვედრას. შეხვედრა შედგება ზურა ჯიშკარიანთან და ანა კორძაია-სამადაშვილთან.
შეხვედრების განრიგი:
- ანა კორძაია-სამადაშვილი – 25 მარტი, შაბათი, 16:00 საათი
- ზურა ჯიშკარიანი – 26 მარტი, კვირა, 15:00 საათი
ასევე, გამოფენის ფარგლებში გამომცემელი მარიამ კორინთელი და გამომცემელი ირაკლი ბაკურიძე წარადგენენ გამომცემლობის – „წიგნები ბათუმში“ ახალ წიგნებს.
გამოფენის ფარგლებში გაიმართება არაერთი ლექცია და უმაღლესი სასწავლებლების პროგრამების პრეზენტაცია.
სპორტის სასახლის მისამართია ლადო ასათიანის #27.
ბათუმის წიგნისა და უმაღლესი განათლების პირველი საერთაშორისო გამოფენის სრული პროგრამა და ღონისძიებების განრიგი შეგიძლიათ ნახოთ გამოფენის ორგანიზატორის, „ექსპობათუმის“ ფეისბუქის გვერდზე.
