ნიდერლანდებში სარკინიგზო მოძრაობა ერთდროულად რამდენიმე მარშრუტზე შეჩერდა. მიზეზი მაჩვებია, რომლებმაც რკინიგზის ლიანდაგის ქვეშ ორმოები გათხარეს – ამის შესახებ „ბიბისი“ წერს.
მატარებლების მიმოსვლა შეჩერდა ქვეყნის ჩრდილოეთით და სამხრეთით, ზოგიერთ მარშრუტზე – სულ მცირე ერთი კვირით.
„ბიბისი“ წერს, რომ გზა ქვეყნის სამხრეთით ქალაქ დენ ბოშსა და ბოქსტელს შორის სამშაბათს დაიკეტა მას შემდეგ, რაც მაჩვების გათხრილი გვირაბები აღმოაჩინეს.
ოფიციალური პირები აცხადებენ, რომ უცნობია, რამდენ ხანს იქნება ეს პრობლემა, რადგან მაჩვი დაცული სახეობაა, რაც ნიშნავს, რომ რემონტის დაწყებამდე ხელისუფლებისგან ნებართვა უნდა იქნას მიღებული.
სარკინიგზო კომპანია ProRail-ის აღმასრულებელმა დირექტორმა თქვა, რომ მაჩვების გამო კვირაში მეორეჯერ გაჩერდა ტრანსპორტის მოძრაობა.
მან აღნიშნა, რომ ამ პრობლემის მოგვარებას შეიძლება დიდი დრო დასჭირდეს, რადგან მემანქანეებს სჭირდებათ ნებართვა ცხოველების გადასაყვანად მათ ბუნებრივ საცხოვრებელ არეალში.
მისივე თქმით, ბოლო დღეებში ჩატარებულმა შემოწმებამ ცხადყო, რომ მაჩვები ჩვეულებრივზე ბევრად უფრო აქტიურად თხრიან, რაც გავლენას ახდენს ლიანდაგის უსაფრთხოებაზე.
მარტის დასაწყისში ქვეყნის ჩრდილოეთით მაჩვებმა გათხარეს გვირაბები სარკინიგზო ლიანდაგების ქვეშ ქალაქ მოლვერუმთან, ფრისლანდიის პროვინციაში, რის გამოც მოძრაობა ერთ-ერთ სარკინიგზო ხაზზე აპრილამდე შეჩერდა.
