მთავარი,სიახლეები

ბათუმის „თავისუფლების კვარტალში“ ოპოზიცია 29 მარტს საპროტესტო აქციას იწყებს

22.03.2023 • 1159
ბათუმის „თავისუფლების კვარტალში“ ოპოზიცია 29 მარტს საპროტესტო აქციას იწყებს

ბათუმის „თავისუფლების კვარტალში“ 29 მარტს, 5 საათზე, ენმ საპროტესტო აქციას აანონსებს. მოთხოვნა ევროკავშირის კანდიდატი წევრის სტატუსის მისაღებად 12 პუნქტის შესრულებაა.

თავისუფლების კვარტალს“ ოპოზიცია აჭარის მთავრობის სახლის წინ არსებულ ადგილს უწოდებს, სადაც 2020 წლის საპარლამენტო არჩევნების შემდეგ კარვები იყო გაშლილი და გამსახურდიას ქუჩა 120 დღე გადაკეტილი იყო. ენმ-ს ქობულეთის ორგანიზაციის თავმჯდომარის, ბონდო თედორაძის თქმით, ამ ეტაპზე „თავისუფლების კვარტალში“ კარვების გაშლა დაგეგმილი არ არის.

„ეს იქნება მოსამზადებელი აქცია 9 აპრილის აქციისთვის, რომელიც თბილისში გაიმართება, რუსთაველზე…

აქციაზე შეკრებილი ადამიანები თავად გადაწყვეტენ, რა ფორმით უნდა გაგრძელდეს აქცია. ბოლო პროცესებმა დაგვანახა, რომ ყველაფერს წყვეტს ხალხი, განსაკუთრებით კი, ახალგაზრდები ევროპული მომავლის დასაცავად. ასე რომ, უნდა მივყვეთ ხალხს.

ჩვენ ამ ადგილს ვეძახით „თავისუფლების კვარტალს“ და არა თორნიკე რიჟვაძის დროებით თავშესაფარს… ეს იქნება რეგიონული მასშტაბის აქცია, რამდენიმე რეგიონში დაიგეგმა აქცია და, მათ შორის, ბათუმში. გვიერთდებიან სხვა პარტიები და რაც მთავარია, სამოქალაქო ორგანიზაციებიც, რადგან ჩვენი მოთხოვნა მხოლოდ 12 პუნქტის შესრულებაა ევროპული მომავლისთვის,“ – აღნიშნა ბონდო თედორაძემ „ბათუმელებთან“.

ევროკავშირის 12 პირობის შესრულების მოთხოვნით რამდენიმე ოპოზიციური პოლიტიკური პარტია პარლამენტთან აქციის მოწყობას 9 აპრილს, 5 საათიდან გეგმავს.

მთავარი ფოტო: თავისუფლების კვარტალი ბათუმში, 2021 წლის ფოტო

გადაბეჭდვის წესი


ასევე: