მთავარი,სიახლეები

3 ქალი სექსუალურ შევიწროებაში ამხელს რამიშვილს – მას და „ოცნებას“ ერთნაირი გზავნილები აქვთ

21.03.2023 • 5245
3 ქალი სექსუალურ შევიწროებაში ამხელს რამიშვილს – მას და „ოცნებას“ ერთნაირი გზავნილები აქვთ

„…ჩემთვის არ არის დამაჯერებელი, რომ 7 წელი ადამიანი რაღაცას არ აცხადებდა და ახლა გაახსენდა ამ ფაშისტური კამპანიის ფონზე. ესეთი დამთხვევების მე არ მჯერა… ეს, დიდი ალბათობით, არის ფაშისტური კამპანიის ნაწილი.

ამას გამოძიება სჭირდება, მაგრამ როდესაც ფაშიზმის კამპანიას ემთხვევა ეს ყველაფერი, მინიმუმ ძალიან საეჭვოა. ეს არის კრიტიკული ტელეკომპანიის და ჟურნალისტების, წამყვანების მიმართ დისკრედიტაციის კამპანიის ნაწილი,“ – ასე დაიცვა შალვა რამიშვილი დღეს მამუკა მდინარაძემ, პარლამენტში „ქართული ოცნების“ ფრაქციის ხელმძღვანელმა.

20-21 მარტს „პოსტ ტვ“-ის დირექტორი შალვა რამიშვილი სამმა ქალმა ამხილა სექსუალურ შევიწროებაში. სწორედ ამ ფაქტის შეფასებისას „ქართული ოცნების“ გზავნილები პრორუსული ტელევიზიის გზავნილებს დაემთხვა ერთი-ერთში.

„ქართული ოცნების“ ლიდერის მსგავსად, შალვა რამიშვილიც „ფაშისტებზე“ საუბრობს.

„…ლიბერალი ფაშისტების კიდევ ერთი მიზანია, დააბულინგონ და შეაშინონ ჩვენი გუნდის წევრები, ხელი ააღებინონ იმ ბრძოლაზე, რომელსაც ეს არხი ბოლო წლებია წარმატებით ეწევა.

ტელეკომპანია POSTV-ის დიდი გუნდის სახელით, ღიად ვაცხადებთ, რომ ლიბერალ-ფაშისტების ამ ამოცანას შესრულება არ უწერია და ფეიკების მამხილებელ ტელევიზიას ფეიკებით ვერ შეაშინებენ,“ – აღნიშნულია ტელეკომპანია „პოსტ ტვ“-ის ფეისბუქგვერდზე გავრცელებულ განცხადებაში.

შალვა რამიშვილმა „ბათუმელებს“ უთხრა, რომ ტელევიზიის ამ განცხადების გარდა, იგი სხვა კომენტარს არ გააკეთებს.

დღეს, 21 მარტს, „პოსტ ტვ“-ის დირექტორი შალვა რამიშვილი სექსუალურ შევიწროებაში დაადანაშაულეს ჟურნალისტმა მაკო ჯაბუამ, მსახიობმა ანანო იაშვილმა და გვანცა ბუღადაშვილმა.

ეს არ არის პირველი შემთხვევა, როცა შალვა რამიშვილს ედავებიან სექსუალურ შევიწროებას – 2018 წელს მას „სექსუალური შევიწროების ფაქტი“ დაუდასტურდა – თბილისის საქალაქო სასამართლომ კი რამიშვილს 2 ათასი ლარი ჯარიმის გადახდა დააკისრა.

„…წლებია თავს ვიკავებ, მაგრამ ქალური შეგრძნებები და ვალდებულებები არ მაძლევს იმის უფლებას, რომ სოლიდარობა არ გამოვხატო ყველა ქალის მიმართ, ვინც ეს გაიარა და ვაღიარო, რომ წლების წინ მეც გავხდი მისგან სექსუალური შევიწროების მსხვერპლი!“ – წერს ფეისბუქში ანანო იაშვილი. ის ბათუმის დრამატული თეატრის მსახიობია და ასეთ შემთხვევას იხსენებს:

„18 წლის ასაკში, ბავშვი, რომელიც ვოცნებობდი მსახიობობაზე, ტელევიზიაზე, პირადად მან დამირეკა, დამიბარა გასაუბრებაზე ტელევიზიაში – ტვ იმედი, წინასწარ გამაფრთხილა, რომ გამომწვევად ჩაცმული მივსულიყავი [პერსონაჟია ასეთიო] გასაუბრებაზე. რა და როგორ მითხრა და რა გადავიტანე, ამას აღარ მოვყვები ამ ეტაპზე.

თვეების შემდეგ კიდევ დამირეკა ახალი შემოთავაზებით [წინაზე უარის შემდეგ] და წლების განმავლობაში პერიოდულად მიგზავნის ისტერიულად მეგობრობის თხოვნას, მერე აუქმებს, მერე მიგზავნის, მერე აუქმებს…. მანიაკია ჩვეულებრივი და ამ ადამიანს აქვს პლატფორმა, საიდანაც ვიღაცას რაღაცას მოუწოდებს! და თავისუფლად დადის ქუჩებში… მე კიდე წლები დამჭირდა ამ ტრავმის გადასახარშად,“ – დაწერა საკუთარ ფეისბუქგვერდზე ანანო იაშვილმა.

„ძალიან რთული იყო სამსახურის შოვნა“, – წერს ფეისბუქში ჟურნალისტი მაკო ჯაბუა შალვა რამიშვილზე. – „არავინ მყავდა, ვინც ხელს შემიწყობდა ამ კუთხით. დროებით ხან სად ვმუშაობდი და ხან სად. ჟურნალისტობა მინდოდა მუდამ და, სამწუხაროდ, უშედეგო იყო მაშინ ყველა მცდელობა.

ჩემი ახლო მეგობარი მუშაობდა შალვა რამიშვილთან [მას ცუდი გამოცდილება არ ჰქონია, თორემ მგლის ხახაში არ შემაგდებდა], მითხრა, რაღაც ტელევიზიის გაკეთებას აპირებს და კადრებს ეძებს, ვეტყვი შენზე და დაგიბაროს იქნებ გასაუბრებაზეო.

მეც გამიხარდა, შანსი დავინახე, დავთანხმდი. დამიბარა, მაგრამ ვაჟაზე, ოფისადქცეულ ბინაში. მივედი. [შალვაზე რაღაცები მსმენია, მაგრამ მე თამამი და გამბედავი ადამიანი ვარ, ჩემი თავის იმედი ყოველთვის მაქვს, ამიტომ „არ შემშინებია“ მასთან მარტო დარჩენის].

გასაუბრება ნორმალურად დაიწყო. გამომკითხა რაღაცები, მიხვდა რომ „ცოცხალი“ გოგო ვარ და შემდეგ დაიწყო: – შენ ისეთი არასტანდარტული და თამამი გარეგნობა გაქვს (წითელი თმა და პირსინგი მქონდა), დარწმუნებული ხარ, რომ უბრალო ჟურნალისტი გინდა იყო? – მეთქი, რავი, ახალი ამბების ჟურნალისტობა მინდა.

– ხო გასაგებია, მაგრამ იქნებ რამე შენი გადაცემა გავაკეთოთ. საცურაო კოსტიუმში როგორ გამოიყურები?

ეს ცოტა მეუხერხულა, მაგრამ არ დავბნეულვარ.

– კარგად ალბათ.

– ჰოდა, ასეთი იდეა მაქვს, აუზში ვიღაცები რომ მოიწვიო და უხერხული კითხვები დაუსვა. მაგალითად, რა პოზაში მოსწონთ, ფეილები რა ჰქონიათ, რომელ პორნოს უყურებენ… და ისე შენ როგორ პორნოს უყურებ? გიყვარს?

აი, მანდ უკვე გადაჭრით ვიცოდი, ვისთან მქონდა საქმე )) არ ვიცი, ჩემს თავში გადავწყვიტე, რომ არ უნდა შემშინებოდა, სიმშვიდე შემენარჩუნებინა, რაღაც გადამიტრიალდა, თან გავქვავდი [თავდაცვის ინსტინქტი იყო ალბათ], ვიფიქრე, იქნებ, თემა შემიცვალოს და მეთქი „გეი პორნოს ალბათ”.

– ხოო, ახლა რომ ჩაგირთო რას იგრძნობ?

– არ ვიცი.

– მოდი ვნახოთ, უხერხულ სიტუაციებს როგორ უმკლავდები [ამის მერე რთავს პორნოს].

– რას გრძნობ?

– უხერხულობას [თან არ ვიცი, როგორ შევძელი, მაგრამ საერთოდ არაფერს ვგრძნობდი, ერთი ის იყო, რომ ვერ ვდგებოდი ადგილიდან].

– არ გინდა დაან*რიო?

-არა.

– მე რომ დავანძ*იო, რას იზამ?

– არ ვიცი.

ამის მერე იხსნის შარვალს და მიყურებს თვალებში. მე ვპოულობ ძალას, ვდგები რამდენიმე წუთის შემდეგ და კარგი, მე ახლა წავალ და ვიფიქრებ ამ შემოთავაზებაზე.

– კაი, კაი, მოიცა. გაგაცილებ. რითი მოხვედი? აი, 10 ლარი გამომართვი და ტაქსით წადი.

არასდროს დამავიწყდება ეგ 10 ლარი, რომელიც რობოტივით გამოვართვი და გამოვედი. 2 საათი ფეხით ვიარე, სახლში მისულმა კიდევ აბაზანაში ვიტირე დიდი ხანი. იმ საღამოსვე მომწერა, არ ვუპასუხე. რამდენიმე დღე მწერდა და მერე ჩემს მეგობარს მისწერა, არ მპასუხობს და რა გითხრა? რას აპირებსო?

ეს ამბავი ძალიან ცოტა ადამიანმა იცოდა აქამდე. ერთხელ ერთ კოლეგას ვუთხარი, რომელიც მასთან მუშაობდა და მე ვმეგობრობდისავით – ნუ, მას შემდეგ წამყვანიც გახდა იმ ტელევიზიაში:) აი, ეს არის შალვა რამიშვილი, აი, ასეთი ისტორია არის ძალიან, ძალიან ბევრი და ამ ნაძირალა, ბინძურმა არსებამ მე ვერაფერი დამიშავა, იმიტომ, რომ „ძლიერი“ აღმოვჩნდი და არ შემეშინდა მისი, მაგრამ რამდენია, ვისაც უდიდესი ტრავმა მიაყენა?!“ – დაწერა ფეისბუქში მაკო ჯაბუამ.

შალვა რამიშვილი სექსუალურ შევიწროებაში დღეს ასევე დაადანაშაულა გვანცა ბუღადაშვილმაც, მან სქრინებიც გამოაქვეყნა:

„თუ სწორად მახსოვს, 2018 წელი იყო. შალვა რამიშვილმა მომწერა, გადაცემისთვის ახალ სახეებს ვეძებ და გასაუბრებაზე მოდიო. მეც, როგორც ყოველთვის, ძალიან მჭირდებოდა სამსახური. [მაშინ „პოსტ ტვ“ მხოლოდ ონლაინტელევიზია იყო], მივედი და რაც შემდეგ მოხდა, არავის, უკვე აღარავის გაგაოცებთ.

ვისაუბრეთ ყველაფერზე, პოლიტიკაზე, ჭამაზე, გართობაზე და მიადგა სექსუალურ საკითხებსაც. მითხრა, რომ განსაკუთრებული შარმი მაქვს და შემიძლია ჩემი შარმის წყალობით ბევრ რამეს მივაღწიო [ზუსტად არ მახსოვს, როგორ თქვა და ამიტომ ვერ ვციტირებ].

უხერხულობა ვიგრძენი და წამოვედი.

რამდენიმე დღეში ისევ მომწერა ან დამირეკა. სამსახურის დაწყება თუ გინდა, მოდი რაღაცები გავარკვიოთო. მივედი. უკვე ნასვამი იყო და მთელი არსებით პირდაპირ მოითხოვდა, რომ ჩემს ფეტიშებზე მელაპარაკა. რა თქმა უნდა, რამდენიმე წუთში წამოვედი და უკვე ნათელი იყო, ვისთანაც მქონდა საქმე და მივხვდი, რომ ამ „სამსახურის“ გზა საწოლზე გადიოდა.

მითხრა, რომ ზოგადად ეგეთი არაა და უბრალოდ მე ვარ განსაკუთრებული. ტასო ბარნოვას ამბავიც გავუხსენე და, რა თქმა უნდა, სისულელეებით სცადა თავის მართლება.

ამ ამბიდან მალევე „ევოში“ დავიწყე მუშაობა და მწერდა, რომ პირდაპირ საცოდაობაა, როცა ჩემნაირი ნიჭიერი გოგო ღამეებს კაზინოში ათენებს და მერე „შემახარბა“, რომ „პოსტ ტვ“-ი უკვე ნამდვილი ტელევიზია გახდა. ასეთი ადამიანები გვკიცხავენ ახალგაზრდებს და მთელი გულით მჯერა, რომ ძალიან, ძალიან მალე გაჰყვებიან კოლექტიური შალვა რამიშვილები იმ ცნობილ გემს,“ – დაწერა გვანცა ბუღადაშვილმა.

გვანცა ბუღადაშვილმა გამოაქვეყნა შალვა რამიშვილთან მიმოწერის ამსახველი სქრინებიც.

„ამ პოსტებში ცხადია ჩანს, შესაძლო სექსუალური შევიწროების შემთხვევები,“ – ამბობს ანა არგანაშვილი, „პარტნიორობა ადამიანის უფლებების“ ხელმძღვანელი. იურისტი განმარტავს, რომ ქალებმა სახალხო დამცველს უნდა მიმართონ ამ შემთხვევაში, რომელიც მსგავსი დავების განხილვისას ვადებში შეზღუდული არ არის.

„მნიშვნელოვანია სახელი დაერქვას… ეს უნდა დაადგინოს სახალხო დამცველმა,“ – გვითხრა ანა არგანაშვილმა.

სექსუალური შევიწროების შემთხვევებს განიხილავს სასამართლოც, სადაც ერთწლიანი ხანდაზმულობის ვადა მოქმედებს. თუმცა მნიშვნელოვანია დანაშაულის განგრძობითობა, შესაძლოა სექსუალური შევიწროების ფაქტი ეხება წლების წინ მომხდარ შემთხვევას, მაგრამ იგი წლობით გრძელდებოდეს.

გადაბეჭდვის წესი


ასევე: