მთავარი,სიახლეები

რუსული ენის ცოდნა – ახალი მოთხოვნა დასაქმების მსურველებისთვის

20.03.2023 • 5465
რუსული ენის ცოდნა – ახალი მოთხოვნა დასაქმების მსურველებისთვის

ბათუმში მცხოვრები სამსახურის მაძიებლები ამბობენ, რომ ბოლო ერთი წელია შრომის ბაზარზე ახალი მოთხოვნა გაჩნდა – რუსული ენის ცოდნა.

ადრე თუ დამსაქმებლები ინგლისურს ითხოვდნენ, დღეს ჯერ იმას გეკითხებიან, იცი თუ არა რუსული და შემდეგ ინტერესდებიან სხვა ენების ცოდნით და უნარებით.

მარიამ დუმბაძე ერთ-ერთი მათგანია, ვინც სამსახურს ეძებს.

„სამსახურის ძიებაში ვარ. ძებნის პროცესში ხშირად დაბრკოლებას მიქმნის რუსული ენის არ ცოდნა. რამდენიმე დღის წინ ვნახე, ერთ-ერთ რესტორანს ვაკანსია ჰქონდა მოლარე-ოპერატორის პოზიციაზე. მომეწონა სამუშაო დრო და მოვალეობებიც. თუმცა უარი იმის გამო მივიღე, რომ რუსული ენაზე არ ვსაუბრობდი. ამ პოზიციაზე კი სჭირდებოდათ რუსულ ენის მცოდნე კადრი,“ – ამბობს მარიამი.

მარიამი 26 წლისაა. ის იმ თაობის წარმოადგენს, რომელსაც რუსული ენას სკოლაში სავალდებულო საგნად აღარ ასწავლიდნენ. მარიამმა გერმანული და ინგლისური ისწავლა.

მარიამი და მისი მეგობრები ხშირად ავსებენ განაცხადებს და სხვადასხვა კომპანიაში აგზავნიან. მარიამის თქმით, ტენდენცია შეიცვალა. ადრე თუ ინგლისური ენის ცოდნა აუცილებელი იყო, ახლა განაცხადებში „სასურველად“ არის მითითებული.

„ცუდია ის, რომ დასაქმების საიტებზე ინგლისური ენის ცოდნა „სასურველია“ და კანდიდატს რუსული ენის ცოდნას და ამ ენაზე თავისუფლად საუბარს სთხოვენ,“ – ამბობს მარიამი.

სამსახურს ეძებს ნატა ფარტენაძეც. ცოტა ხნის წინ იფიქრა, რომ მის უმუშევრობას წერტილი დაესვა – ნატამ გასაუბრება წარმატებით გაიარა და სამსახურში აიყვანეს.

„ერთ-ერთ რესტორანში ესაჭიროებოდათ მენეჯერი. ყველა მოთხოვნას ვაკმაყოფილებდი, რაც ჰქონდათ განაცხადში მითითებული. გასაუბრება წარმატებით გავიარე და ამიყვანეს.

სამსახურში გასვლამდე ორი დღით ადრე დამირეკეს, მკითხეს მზად ვიყავი თუ არა ამხელა პასუხისმგებლობისთვის. კიდევ ერთხელ დავუდასტურე, ჩემი იდეები და სამომავლო გეგმებიც გავუზიარე. საუბრის დასასრულს მკითხეს – რუსული ხომ იცი?! ვუპასუხე, რომ ვიცოდი, მაგრამ გამართულად არა.

პასუხმა არ დააყოვნა – ეს როგორ გამოგვეპარა, სამწუხაროდ ვერ შედგება ჩვენი თანამშრომლობაო და დამემშვიდობა,“ – იხსენებს ნატა.

ნატას თქმით, საქართველოში ისედაც ძალიან რთულია სამსახურის პოვნა, რადგან დამსაქმებლები ხშირად მრავალწლიან გამოცდილებას ითხოვენ და არ ირჩევენ დამწყებებს.

„ახლა ამ ყველაფერს დაემატა ის, რომ რაც არ უნდა მრავალწლიანი გამოცდილება გქონდეს, აუცილებლად უნდა ფლობდე რუსულ ენას. ორი წელია სამსახურის ძიებაში ვარ იმ იმედით, რომ ჩემს იდეებს და გამოცდილებას ვინმე დააფასებს და არ მომთხოვს რუსული ენის ცოდნას ისე, როგორც მშობლიურ ენას ვფლობ,“ – ამბობს ნატა.

Jobs.ge საქართველოში ერთ-ერთი ყველაზე დიდი დასაქმების ვებგვერდია. „ბათუმელებმა“ გადაამოწმა მხოლოდ მომსახურების სფეროში არსებული ვაკანსიები. ისეთ პოზიციებზე, როგორიცაა ოპერატორი, მოლარე, კონსულტანტი, საკვალიფიკაციო მოთხოვნებში შეგხვდებათ შემდეგი შინაარსის ტექსტები:

„რუსული ენის ცოდნა სასაუბრო დონეზე“, „რუსული და ინგლისური ენის ცოდნა საკომუნიკაციო დონეზე“, „უცხო ენები: რუსული, ინგლისური“.

მარკეტერი ნათია სირაბიძე „ბათუმელებთან“ ამბობს, რომ სიტუაცია „ბაზარმა დაარეგულირა“.

„ადრე თუ ინგლისური ენის ცოდნას წერდნენ საკვალიფიკაციო მოთხოვნებში, ახლა დაემატა რუსული ენა. გარკვეულწილად მოთხოვნის მატება შეინიშნება. თუმცა ვერ ვიტყვი იმას, რომ ეს მხოლოდ ბათუმშია. თბილისშიც იგივე სიტუაციაა. უბრალოდ რადგან დიდი აგრესიაა რუსული ენის მომთხოვნი კომპანიების მიმართ, წინასწარ არ ამბობენ და შემდეგ გასაუბრებაზე ეუბნებიან კანდიდატებს, რომ უპირატესობას ანიჭებენ მათ, ვინც რუსული ენა იცის,“ – ამბობს  ნათია სირაბიძე.

მარკეტერის თქმით, ხშირად შეუნიშნავს, როცა ამა თუ იმ მომსახურების ობიექტზე შესვლისას კონსულტანტი ცდილობს რუსულად დაელაპარაკოს მომხმარებელს.

„მაღაზიის კონსულტანტს სულ არ მოეთხოვება იცოდეს სხვა ენები, რადგან საქართველოში მუშაობს. პირიქით, ჩვენ უნდა ვუბიძგოთ უცხოელებს, რომ ელემენტარული ქართული ისწავლონ.

ბაზარი მართავს – რა თქმა უნდა დამსაქმებლის საქმეა, მაგრამ ინიციატივა, აგერ მე რუსული ვიცი და დაგელაპარაკები, მაღიზიანებს. ამიტომ ისევ ჩვენ უნდა დავარეგულიროთ. თუ არ არის აუცილებლობა, რატომ უნდა ველაპარაკოთ რუსულად?“ – კითხვას სვამს ნათია სირაბიძე.

გადაბეჭდვის წესი


ასევე: