„მართლა აგენტო, ვის ინტერესებს წარმოადგენ?“ – ასე მიმართა დღეს, 7 მარტს, პარლამენტის წევრმა ანა ნაცვლიშვილმა რუსული კანონპროექტის ერთ-ერთ ინიციატორს, გურამ მაჭარაშვილს „ხალხის ძალიდან“.
საზოგადოების პროტესტის მიუხედავად, დღეს, 7 მარტს, საპარლამენტო უმრავლესობა რუსულ კანონპროექტს განიხილავს. მანამდე „ოცნებამ“ განაცხადა, რომ კანონპროექტის განხილვა გადაიდებოდა 9 მარტისთვის, თუმცა დღეს, 7 მარტს, დაჩქარებული წესით აპირებს პირველი მოსმენით მიიღოს რუსული კანონი.
„დილით მე და თამარ კორძაიამ წაგიკითხეთ გრძელი და ძალიან საპატიო სია იმ მოქალაქეების, რომლებიც ღიად ეუბნებიან არას რუსულ კანონს. ორგანიზაციების და ჯგუფების, ასევე ძალიან გრძელია სია იმ ადამიანების, რომლებიც უერთდებიან ამ პროტესტს, მათ შორისაა არაერთი თქვენი ყოფილი თანაგუნდელი, ყოფილი პარლამენტარი, ყოფილი პრემიერი, ყოფილი პრეზიდენტი და ასე შემდეგ.
ეს ადამიანები გეუბნებიან, რომ ეს კანონი არ უნდა მიიღოთ, ის ანგრევს საქართველოს მომავალს, ამასვე გეუბნებიან ჩვენი მეგობრები და პარტნიორები და ამდენი ტყუილებით რომ არის სავსე ეს განმარტებითი ბარათი, რომ თითქოს კარგი დოკუმენტია და ამ დროს ყველაფერს ეწინააღმდეგება თქვენი განზრახვა, – საქართველოს კონსტიტუციას, ევროკავშირის სამართალს, ჩვენს ევროპულ სწრაფვას, ეწინააღმდეგება ვენეციის კომისიის სტანდარტებს, ეწინააღმდეგება ყველა იმ საერთაშორისო დოკუმენტაციას ადამიანის უფლებებში, იქნება ეს გაეროს თუ ადამიანის უფლებათა სტრასბურგის კონვენცია.
და ამდენი ადამიანი, ამდენი ჯგუფი, ამდენი ქვეყნის მოკეთე და მოყვარული გეუბნებათ, რომ არ მიიღოთ ეს კანონი და ახლა, ყველაფერთან ერთად ასე, ფარულად და მოპარვით დაიწყეთ განხილვა და მაინც ჯიუტად გინდათ, რომ მიიღოთ ეს კანონი, როცა ქართველი ხალხი გეუბნებათ არას? “- განაცხადა ანა ნაცვლიშვილმა.
„ქართული ოცნების“ წევრებმა რუსული კანონპროექტის პლენარულ სხდომაზე განხილვა მას შემდეგ დააანონსეს, რაც პარლამენტთან მიმდინარე საპროტესტო აქცია დაიშალა.
მას შემდეგ, რაც ცნობილი გახდა, რომ უმრავლესობა დღეს პირველი მოსმენით აპირებს კანონის მიღებას, ოპოზიციონერმა პარლამენტარებმა მოქალაქეებს მოუწოდეს პარლამენტთან შეკრებისკენ.
ამავე თემაზე:
მოდით პარლამენტთან, არ დავუშვათ ოკუპაცია მორიგ ჯერზე – ოპოზიციის მიმართვა მოქალაქეებს
