საქართველოს პარლამენტმა დღეს, 7 მარტს, წინასწარი ინფორმირების გარეშე დაიწყო რუსული კანონპროექტების განხილვა, დაანონსებული ხუთშაბათის ნაცვლად.
„ქართული ოცნების“ წევრებმა რუსული კანონპროექტის პლენარულ სხდომაზე განხილვა მას შემდეგ დააანონსეს, რაც პარლამენტთან მიმდინარე საპროტესტო აქცია დაიშალა.
მას შემდეგ, რაც ცნობილი გახდა, რომ უმრავლესობა დღეს პირველი მოსმენით აპირებს კანონის მიღებას, ოპოზიციონერმა პარლამენტარებმა მოქალაქეებს მოუწოდეს პარლამენტთან შეკრებისკენ.
„ჩვენი ქვეყანა არ უნდა იყოს რუსეთის დაქვემდებარებაში მყოფი ტერიტორია. მოგიწოდებთ, მოდით პარლამენტის შენობასთან და უთხარით თქვენი სათქმელი ამ სამარცხვინო, საოკუპაციო რეჟიმს, რომელიც თქვენ უკვე ერთხელ უთხარით, როცა გაბედეს და გავრილოვი დასვეს დარბაზში.
დღეს უარესი რამ ხდება ჩვენს ქვეყანაში.
ამ კანონის მიღებით იქმნება კედელი ჩვენს და ევროკავშირს შორის“.
„ჩვენ გვჭირდება თქვენგან, ქართველის ხალხისგან, გაძლიერებული, გამაგრებული ზურგი, ამიტომ ყველა საქართველოს პარლამენტთან, ყველა, ვისაც შეუძლია ფიზიკურად სიარული. თქვენ შეგიძლიათ ჩათვალოთ, რომ დღეს თქვენს ქვეყანას ქართული ოცნება მორიგ ჯერზე აბარებს პუტინის რეჟიმს.
მოდით პარლამენტთან, არ დავუშვათ ჩვენი ქვეყნის ოკუპაცია მორიგ ჯერზე“ – განაცხადა სალომე სამადაშვილმა ბრიფინზე.
მან ასევე მოუწოდა „ერთიან ნაციონალურ მოძრაობას“, შეწყვიტოს ბოიკოტი და შეუერთდეს დღეს პარლამენტის სხდომას საბრძოლველად.
