სამხრეთ თურქეთში, 6 თებერვალს მომხდარი მიწისძვრის შედეგად შენობების მასობრივად ნგრევის საქმეზე სულ მცირე 247 ეჭვმიტანილია დაკავებული. სასამართლოს მონაცემებს თურქული საინფორმაციო სააგენტო “ანადოლუ” აქვეყნებს.
გამოცემის თანახმად, დაკავებულთა შორისაა 93 კონტრაქტორი, შენობის 123 ზედამხედველი და 13 მფლობელი.
„თუმცა, სასამართლოს კონტროლის ქვეშ იმყოფება 322 ეჭვმიტანილი, მათ შორის: 78 კონტრაქტორი, 177 შენობის ზედამხედველი და 37 შენობის მფლობელი” – წერს სააგენტო.
გასულ თვეში თურქეთში მომხდარი დამანგრეველი მიწისძვრის შედეგად დაღუპულთა რიცხვი 45 968-მდე გაიზარდა.
მიწისძვრისგან დაზარალებულ 10 პროვინციაში 170 000 შენობის შემოწმების შემდეგ თურქეთის ხელისუფლებამ განაცხადა, რომ 25 000 სახლი მთლიანად განადგურდა ან ძალიან მძიმედ დაზიანდა.
თურქეთში ოპოზიცია დაკავებების ამ სერიას აფასებს, როგორც ხელისუფლების მცდელობას, მოსახლეობის ბრაზი და ყურადღება გადაიტანოს მშენებლებსა და დეველოპერებზე, ნაცვლად საჯარო სამსახურების პასუხისმგებლობისა.
ოპოზიციის აზრით, პრეზიდენტ ერდოღანის მმართველობის 20 წლის განმავლობაში ხელისუფლება თვალს ხუჭავდა სამშენებლო ნორმების დარღვევებზე და არასათანადოდ ხარჯავდა შენობების მიწისძვრისგან დასაცავად სპეციალური გადასახადის სახით შეგროვებულ თანხებს.
____________
ფოტო: მიწისძვრა თურქეთში. ფოტო: EPA-EFE/SEDAT SUNA
