გაერთიანებული სამეფოს დაზვერვის პირველი მარტის ანგარიში „შაჰიდებთან“ უკრაინის ბრძოლას მიმოიხილავს. როგორც ანგარიშში ვკითხულობთ, 2023 წლის 27 თებერვალს უკრაინის თავდაცვის სამინისტრომ დაადასტურა ღამის განმავლობაში 14 „შაჰიდით“ თავდასხმა. მათგან უკრაინამ 11 დრონის ჩამოგდება მოახერხა.
კიევის საქალაქო სამხედრო ადმინისტრაციის ხელმძღვანელის, სერხი პოპკოს განცხადებით, ჩამოგდებული დრონებიდან 9 კიევის საჰაერო სივრცის სიახლოვეს იყო. დანარჩენი სამი „შაჰიდი“ კი, გავრცელებული ინფორმაციის თანახმად, ჩრდილოეთ უკრაინაში, ჩერნიგოვის ოლქში ჩამოაგდეს.
ბრიტანეთის დაზვერვის შეფასებით, რამდენადაც 15 თებერვლიდან 27 თებერვლის იერიშამდე დრონებით თავდასხმა არ დაფიქსირებულა, ტემპის მსგავსი კლება შესაძლოა რუსეთის მარაგში აღნიშნული დრონების შემცირებაზე მიუთითებდეს. შესაბამისად, უწყების პროგნოზით, რუსეთი შეეცდება ამ მარაგის შევსებას.
ბრიტანელი ანალიტიკოსები „შაჰიდების“ ტრაექტორიაზე დაყრდნობით წერენ, რომ დიდი ალბათობით, ისინი რუსეთის ბრიანსკის ოლქიდან გაუშვეს. მანამდე კი, 2022 წლის შუა დეკემბრის შემდეგ, დრონების გაშვების ერთადერთ პუნქტად შემჩნეული იყო კრასნოდარის რეგიონი, აზოვის ზღვის გასწვრივ ტერიტორია.
როგორც ანგარიშში ვკითხულობთ, დრონების გაშვების ახალი, მეორე ადგილი, რუსებს შეტევის ახალ მიმართულებას აძლევს – უფრო ახლოს კიევთან. უწყების ვარაუდით, ეს არის რუსების მცდელობა, შეამცირონ უკრაინის საჰაერო სივრცეში ყოფნის დრო და უკრაინის საჰაერო თავდაცვა კიდევ უფრო დატვირთონ.
