სამხრეთ თურქეთში მომხდარი დამანგრეველი მიწისძვრის შედეგად დაღუპულთა რიცხვი 45 089-მდე გაიზარდა. ამის შესახებ დღეს, 1-ელ მარტს, განაცხადა თურქეთის საგანგებო სიტუაციების სამსახურმა, AFAD-მა.
6 თებერვალს თურქეთის სამხრეთ-აღმოსავლეთით შვიდ მაგნიტუდაზე მეტი სიმძლავრის ორი მიწისძვრა მოხდა, რასაც მასობრივი ნგრევა და უდიდესი ადამიანური მსხვერპლი მოჰყვა.
AFAD-ის მონაცემებით, 6 თებერვლის 2 დამანგრეველი მიწისძვრის შემდეგ თურქეთში 11 000-ზე მეტი ბიძგი დააფიქსირეს სეისმოლოგებმა.
თურქეთში მიწისძვრის შედეგად დაზარალებულ პროვინციებში 358 000-ზე მეტი კარავია გაშლილი იმ ადამიანებისთვის, რომელთა სახლები მიწისძვრის შედეგად დაინგრა, პროვინციებში შეიქმნა საკონტეინერო ქალაქები, სადაც უსახლკაროდ დარჩენილი პირები ცხოვრობენ.
თურქული მედია წერს, რომ ქვეყანაში დამანგრეველი მიწისძვრის შემდეგ გაიზარდა მოთხოვნა ზურგჩანთებზე, საძილე ტომრებზე, ფარნებზე და მსგავს, პირველადი საჭიროების ნივთებზე.
____________
ფოტო: EPA-EFE/ERDEM SAHIN
