ხერსონის ოლქის ალეშკასა და სკადოვსკას დასახლებული პუნქტებიდან რუსი სამხედროები დროებით ოკუპირებული ყირიმში გასაქცევად ემზადებიან. ამ ინფორმაციას უკრაინის გენერალურ შტაბზე დაყრდნობით, უკრაინული მედია აქვეყნებს.
გენშტაბის ინფორმაციით, რუსები შიშობენ, რომ უკრაინის შეიარაღებული ძალები მალე დაიწყებს ამ ტერიტორიების გათავისუფლებას.
„უკრაინის ტერიტორიების დეოკუპაციის შიშით, ხერსონის ოლქის ოლეშკასა და სკადოვსკის დასახლებაში რუსეთის ეგრეთ წოდებული საოკუპაციო ხელისუფლება ემზადება დროებით ოკუპირებული ყირიმის ავტონომიურ რესპუბლიკაში გასაქცევად“, – ნათქვამია გენშტაბის დღევანდელ ანგარიშში.
უკრაინულმა მხარე 21 თებერვლიდან აფიქსირებს, რომ ადგილობრივი კოლაბორანტები მიემგზავრებიან ბახჩისარაიში, სიმფეროპოლსა და ქერჩში. უკვე 24 თებერვლიდან ოკუპანტებმა გამოაცხადეს ეგრეთ წოდებული ევაკუაცია ყველა მსურველისთვის.
„კოლაბორანტების გასაყვანად ოკუპანტებმა გამოიყენეს სამხედრო სატვირთო მანქანები, თან მხოლოდ ხელბარგის წაღებაა ნებადართული“, – აცხადებენ გენერალურ შტაბში.
უკრაინული მედიის შეფასებით, ოკუპანტები ანალოგიურად იქცეოდნენ მაშინ, როცა ხერსონის მარჯვენა სანაპიროდან გადიოდნენ.
უნიანის ცნობით, „ახლახან, ოკუპირებული ხერსონის რეგიონის სამხრეთიდან, 200 რუსი სამხედრო იმის გამო გაიყვანეს, რომ ბუნტი ჩაეხშოთ. არეულობა რუს ჯარისკაცებში სარდლობის მიმართ უკმაყოფილებამ გამოიწვია.
უფრო ადრე გენერალურმა შტაბმა გაავრცელა ინფორმაცია, რომ ხერსონის რეგიონში რუსი სამხედროები ადგილობრივ მოსახლეობას ნავებს და სხვა მცურავ საშუალებებს ართმევდნენ. ანალოგიურად რუსები მაშინ იქცეოდნენ, როდესაც ხერსონის მარჯვენა სანაპიროდან გასასვლელად ემზადებოდნენ“.
