რუსეთის პრეზიდენტის, ვლადიმერ პუტინის ახლო გარემოცვა თანამშრომლობს უკრაინის სამხედრო დაზვერვასთან. ამის შესახებ გამოცემა „უკრაინსკა პრავდასთვის“ მიცემულ ინტერვიუში ქვეყნის სამხედრო დაზვერვის ხელმძღვანელმა, კირილო ბუდანოვმა ისაუბრა.
კირილო ბუდანოვმა განაცხადა, რომ ადამიანები, რომლებიც თანამშრომლობენ უკრაინის დაზვერვის მთავარ სამმართველოსთან, მომავალში ნორმალურ ცხოვრებაზე ფიქრობენ.
თუმცა მას არ დაუსახელებია, მაგალითად, რამდენი აგენტი ჰყავთ პუტინის გარემოცვაში.
„იმის გამო, რომ რუსეთის ფედერაციაში ვითარება დღითიდღე უარესდება, დღითიდღე უფრო ადვილია იმ ადამიანების პოვნა, რომლებსაც სურთ თანამშრომლობა“, – ამბობს ბუდანოვი.
ამასთან, მან უპასუხა კითხვას, თუ რა არის იმის გარანტია, რომ ეს აგენტები არ ატყუებენ უკრაინულ მხარეს.
„მაგრამ ამის გადამოწმება ძალიან ადვილია. ჩვენ გვჯერა არა სიტყვების, არამედ მხოლოდ ფაქტების. თუ ადამიანი ამბობს, რომ ხვალ იწვიმებს, მაგრამ არ გაწვიმდება და ის იტყვის: მე შევცდი, ზეგ აუცილებლად იქნება [წვიმა]. შესაძლოა, ის მართლა შეცდა, მაგრამ მსგავს შემთხვევაში ენდობიან ამ ადამიანს? არა – არ ენდობი. ეს არის ალეგორიული პასუხი თქვენს შეკითხვაზე“, – განაცხადა ბუდანოვმა.
უკრაინული მედია აქტიურად ავრცელებს ინფორმაციას დაპირისპირებაზე კრემლის ორ ბანაკს შორის: პრიგოჟინის – სუროვიკინთან და შოიგუს – გერასიმოვთან.
უკრაინის პრეზიდენტის ადმინისტრაციაში კი აცხადებენ, რომ რუსეთში დაიწყო სისტემური დაშლის პროცესი.
რუსეთის სახელმწიფო სათათბიროს ყოფილი დეპუტატის, ილია პონომარევის ვარაუდით კი, თუ რუსეთის პრეზიდენტის, ვლადიმერ პუტინის ნაცვლად ხელისუფლებაში მისი კონსტიტუციური მემკვიდრე, პრემიერ-მინისტრი მიხაილ მიშუსტინი მოვა, ის შეეცდება უკრაინაში საომარი მოქმედებები შეაჩეროს.
