აჭარის მთავრობა უსკოს თავმჯდომარის შესარჩევად კონკურსს ისევ გამოაცხადებს

აჭარის უმაღლესი საბჭო აჭარის უმაღლესი საარჩევნო კომისიის [უსკო] თავმჯდომარის პოსტზე მთავრობის მიერ წარდგენილ დავით ქარცივაძის კანდიდატურას კიდევ ერთხელ უყრის კენჭს.

საბჭოს თავმჯდომარემ ავთანდილ ბერიძემ უკვე გამოსცა ბრძანება 6 ივნისს რიგგარეშე სხდომის მოწვევის შესახებ –  ინფორმაცია „ბათუმელებს“ უმაღლესი საბჭოს ფრაქცია „ქართული ოცნების“ თავმჯდომარემ, ალექსანდრე ჩიტიშვილმა დაუდასტურა.

ეს პროცედურა მხოლოდ კანონმდებლობით გათვალისწინებული მოთხოვნების შესრულების მიზნით ტარდება და როგორც უმაღლესი საბჭოს წევრები ამბობენ, შედეგი არ შეიცვლება, – წინა კენჭისყრაზე დავით ქარცივაძეს ერთი ხმა დააკლდა.

დავით ქარცივაძე უარყოფს გავრცელებულ ინფორმაციას იმის შესახებ, რომ მას არჩილ ხაბაძემ მეორე კენჭისყრამდე კანდიდატურის მოხსნა სთხოვა: „რა აზრი აქვს კანდიდატურის მოხსნას ან არ მოხსნას, არც მეორე კენჭისყრა მაინტერესებს,“ – უთხრა „ბათუმელებს“ დავით ქარცივაძემ სატელეფონო საუბარში.

აჭარის მთავრობა უმაღლესი საარჩევნო კომისიის თავმჯდომარეობის კანდიდატის შესარჩევად სავარაუდოდ კონკურსს ისევ გამოაცხადებს: „ალბათ გამოვაცხადებთ, დაველოდოთ, ჯერ დასრულდეს კანონით გათვალისწინებული პროცედურები,“ – განაცხადეს მთავრობის აპარატში.

კონკურსის გამოცხადების შემთხვევაში, უსკოს თავმჯდომარის შესარჩევად ეს რიგით მეოთხე კონკურსი იქნება. მანამდე არჩილ ხაბაძემ ორჯერ დავით კვაჭაძის კანდიდატურა შემდეგ კი დავით ქარცივაძე წარუდგინა უმაღლეს საბჭოს. ორივე „ქართულ ოცნებასთან“ ასოცირებული პირია, რის გამოც მათ უმაღლესი საბჭოს ოპოზიციის მხარდაჭერა ვერ მიიღეს.

ამავე თემაზე: დავით ქარცივაძე – უსკოს თავმჯდომარეობის ახალი კანდიდატი
დავით ქარცივაძის შანსი უსკოს თავმჯდომარის პოსტზე