აჭარის უმაღლესი საბჭოს წევრების საზღვარგარეთ საქმიანი ვიზიტების მიზნობრიობასა და დაფინანსებას თუ გადავხედავთ, შესაძლოა გაგვიჩნდეს კითხვა – ისინიც ხომ არ უნდა დაექვემდებარონ ახალ კანონპროექტს „უცხოური გავლენის აგენტების“ შესახებ?
გერმანია, საფრანგეთი, შვედეთი, პოლონეთი, პორტუგალია, ჩეხეთი, ბელგია, ნიდერლანდები, ესპანეთი – ეს იმ ქვეყნების არასრული ჩამონათვალია, სადაც აჭარის უმაღლესი საბჭოს წევრები საქმიანი ვიზიტით, გამოცდილების გასაზიარებლად, ერთობლივ კონფერენციებში მონაწილეობის მისაღებად ან კულტურულ ღონისძიებებზე დასასწრებად მოგზაურობენ.
მივლინებებთან დაკავშირებული დოკუმენტებით ირკვევა, რომ ასეთი მიწვევებისას აჭარის უმაღლესი საბჭოს წევრები ზოგჯერ მხოლოდ მგზავრობისა და დღიური ხარჯის დაფინანსებას იღებენ ბიუჯეტიდან, სხვა დანარჩენს კი: სასტუმროს, კვებას, გადაადგილებას, მასპინძელი ორგანიზაცია აფინანსებს. ხშირ შემთხვევაში ვიზიტები, დღიური ხარჯის ჩათვლით, სრულად არის დაფინანსებული ბიუჯეტიდან.
ჩვენ ჩვენს ხელთ არსებული მონაცემები შევისწავლეთ, 2019 წლის იანვრიდან 2022 წლის მაისის ჩათვლით, რაც ახალი მოწვევის უმაღლესი საბჭოს წევრების მივლინებებთან ერთად წინა მოწვევის უმაღლესი საბჭოს წევრების ვიზიტების შესახებ ინფორმაციასაც მოიცავს.
დოკუმენტების მიხედვით, აჭარის უმაღლესი საბჭოს წევრები საზღვარგარეთ მივლინებაში ყველაზე მეტჯერ 2019 წელს იმყოფებოდნენ, შემდეგ მათ პანდემიამ ხელი შეუშალა, თუმცა უცხოეთში ვიზიტებს მაინც ახერხებდნენ.
დავით გაბაიძე
დავით გაბაიძე ორი მოწვევის აჭარის უმაღლესი საბჭოს თავმჯდომარეა. ოფიციალური მონაცემების მიხედვით, ის ყველაზე ხშირად პოლონეთში ჩადის. სხვადასხვა დროს საქმიანი ვიზიტით ასევე იმყოფებოდა ჩეხეთის დედაქალაქ პრაღაში და გერმანიაში – პოტსდამში.
- 2019 წელს დავით გაბაიძე პოლონეთში ექვსჯერ ჩავიდა
2019 წლის თებერვალში დავით გაბაიძე პოლონეთის ქალაქ კატოვიცეში ჩავიდა, ის აქ 12 იანვრიდან 16 იანვრამდე პერიოდში იმყოფებოდა. როგორც მივლინებასთან დაკავშირებული დოკუმენტებით ირკვევა, ვიზიტის მიზანი „თანამშრომლობის შეჯამება და არსებული ურთიერთობის გაღრმავება იყო“.
სამივლინებო დოკუმენტებით ირკვევა ასევე, რომ ადგილზე დაბინავების, კვებისა და შიდა გადაადგილების ხარჯი მასპინძელმა მხარემ გაიღო. უმაღლესი საბჭოს ბიუჯეტიდან ამ ვიზიტისთვის მხოლოდ ჩასვლა- ჩამოსვლის ხარჯი დააფინანსეს.
ვიზიტის ფარგლებში აჭარიდან ჩასულ სტუმრებს სილეზიის სავოევოდოს ტერიტორიაზე, ბესკიდების მთათა ზოლში არსებული სათხილამურო კურორტების გაცნობას და ტურისტული მიმართულებით გამოცდილების გაზიარებას დაჰპირდნენ.
დავით გაბაიძის ბრძანების შესაბამისად, მასთან ერთად პოლონეთში მისი ყოფილი მოადგილე მერაბ კარანაძე [უმაღლესი საბჭოს ყოფილი წევრი], მისი კაბინეტის უფროსი ზურაბ ჭურკვეიძე და თანაშემწე – ირინა ბერიძე გაემგზავრნენ.
ამ ვიზიტისთვის, მხოლოდ უმაღლესი საბჭოს თავმჯდომარისა და მისი მოადგილის გზის ხარჯის სახით, უმაღლესი საბჭოს ბიუჯეტიდან 3 153 ლარი დაიხარჯა. ამაში შევიდა როგორც გზის, ასევე დღიური ხარჯი. კაბინეტის უფროსისა და თანაშემწის ხარჯი კი მოწოდებულ ინფორმაციაში მითითებული არ არის.
28 თებერვალს აჭარის მთავრობის თავმჯდომარე უმაღლესი საბჭოს წევრებთან, ილია ვერძაძესა და ვახტანგ წულაძესთან ერთად ისევ პოლონეთში, ამჯერად ქალაქ ვროცლავში გაემგზავრა. აქ დაგეგმილი იყო შეხვედრები საკანონმდებლო ორგანოების წარმომადგენლებთან და სამმხრივი კომისიის სხდომა. უმაღლეს საბჭოს წევრებთან ერთად დელეგაციაში იყვნენ თავმჯდომარის თანაშემწე ირაკლი ბერიძე და კახა ფუტკარაძე, ჯანდაცვისა და სოციალურ საკითხთა კომისიის სპეციალისტი. ვიზიტი ვროცლავში 3 მარტს დასრულდა.
აპრილში დავით გაბაიძე პოლონეთის ქალაქ კრაკოვში ჩავიდა, ის აქ 6-10 აპრილს იმყოფებოდა და კონგრესზე სიტყვით გამოვიდა.
28 მაისს დავით გაბაიძე ისევ ჩავიდა ვროცლავში, ამჯერად მას სოციალურ-ეკონომიკურ ზონაში – ლეგნიცაში და ინდუსტრიის პარკში დაგეგმილ შეხვედრებში უნდა მიეღო მონაწილეობა. დავით გაბაიძე აქ 2 დღით, 30 მაისის ჩათვლით იმყოფებოდა.
- პორტუგალია – ქალაქი ფუნშალი/ჩეხეთი-პრაღა/გერმანია-პოტსდამი
2019 წლის ივლისში დავით გაბაიძე პორტუგალიაში, მადეირას ავტონომიურ ოლქში მიიწვიეს Word trevel avard – ის გალა ცერემონიალზე დასასწრებად, სადაც ბათუმი მსოფლიოს სხვა ქალაქებთან ერთად ტურისტული მიმართულების ნომინაციაზე იყო წარდგენილი.
World Travel Awards- ის დაჯილდოების ცერემონიაზე დავით გაბაიძე 2022 წელსაც იმყოფებოდა ესპანეთში, კუნძულ მალიორკაზე, მეუღლესთან ერთად. როგორც მთავრობამ განმარტა, ამ ვიზიტისთვის ბიუჯეტიდან თანხა არ დახარჯულა და ვიზიტი ბიზნესის წარმომადგენლებმა დააფინანსეს.
აგვისტოში დავით გაბაიძე ჩეხეთის დედაქალაქში ჩავიდა. ის პრაღაში გაეროს განვითარების პროგრამის ფარგლებში, საინფორმაციო ტურში მონაწილეობის მისაღებად მიიწვიეს. უმაღლესი საბჭოს თავმჯდომარე პრაღაში 11 აგვისტოდან 18 აგვისტომდე პერიოდში იმყოფებოდა.
სექტემბერში დავით გაბაიძე გერმანიაში, პოტსდამში იმყოფებოდა ერთი დღით – 24-ში ჩავიდა და 25-ში დაბრუნდა. 26-29 სექტემბერს კი ის ისევ პოლონეთში, ვროცლავში ჩავიდა.
დავით ბაციკაძე – აჭარის უმაღლესი საბჭოს წევრი, ფრაქცია „ქართული ოცნება“
- დავით ბაციკაძის ვიზიტები
დავით ბაციკაძე აჭარის უმაღლესი საბჭოს განათლების, მეცნიერების, კულტურისა და სპორტის საკითხთა კომიტეტის თავმჯდომარეა, წინა მოწვევის უმაღლეს საბჭოში ის თავმჯდომარის მოადგილე იყო. 2020 წლის თებერვალში დავით ბაციკაძე სამუშაო ვიზიტით საფრანგეთში იმყოფებოდა, 2020 წლის 10 თებერვლიდან 15 თებერვლის ჩათვლით კი ის პარიზში ქართველი მხატვრების გამოფენას დაესწრო.
ამ ვიზიტისთვის ბიუჯეტიდან 3 205 ლარი დახარჯეს, ამ თანხაში შედიოდა დღიური დაფინანსება და ღამისთევის ხარჯი. მგზავრობა უმაღლეს საბჭოს არ დაუფინანსებია.
2021 წელს დავით ბაციკაძე სამუშაო ვიზიტით ესპანეთში, ქალაქ ბარსელონაში იმყოფებოდა. აქ ის უმაღლესი საბჭოს კიდევ ერთ წევრთან, ვლადიმერ მგალობლიშვილთან ერთად, ევროპის რეგიონთა ასამბლეას ეგიდით დაგეგმილ Smart City Expo World კონგრესზე დასასწრებად გაემგზავრა. ვიზიტის მიზანი ცოდნისა და გამოცდილების გაზიარება, ასევე სამომავლო თანამშრომლობის განხილვა იყო. ეს ვიზიტი 15 ნოემბრიდან 19 ნოემბრამდე გაგრძელდა.
დეკემბერში კი დავით ბაციკაძე ბელგიაში გაემგზავრა, სადაც ბრიუსელში აღმოსავლეთის პარტნიორობის პროგრამის ფარგლებში, სხვა მონაწილეებთან ერთად, თანამშრომლობის შესაძლო სფეროთა საკითხები უნდა განეხილათ.
ეს ვიზიტი უმაღლესი საბჭოს ბიუჯეტიდან 3 991 ლარით დააფინანსეს. ამ თანხაში შევიდა როგორც მგზავრობის, ასევე კვების, დღიური და სასტუმროს ხარჯი.
2019 წელს დავით ბაციკაძე მივლინებით შვედეთში, ქალაქ ერებრუში იმყოფებოდა. ვიზიტი უმაღლესი საბჭოს ბიუჯეტიდან 1 745 ლარით დააფინანსეს, ეს იყო მგზავრობის, დღიური და ღამისთევის ხარჯი.
2019 წლის 23 ნოემბრიდან 29 ნოემბრის ჩათვლით დავით ბაციკაძე საქმიანი ვიზიტით იმყოფებოდა ლისაბონში, სადაც ის უმაღლესი საბჭოს წევრთან, გიორგი რომანაძესთან ერთად ევროსაბჭოს ჩრდილოეთ-სამხრეთის ცენტრის მიერ ორგანიზებულ ფორუმზე მონაწილეობის მისაღებად გაემგზავრა.
- ვლადიმერ მგალობლიშვილი
ვლადიმერ მგალობლიშვილი აჭარის უმაღლეს საბჭოში საკონსტიტუციო, იურიდიულ და საპროცედურო საკითხთა კომიტეტის თავმჯდომარეა. წინა მოწვევის უმაღლეს საბჭოში ის განათლების კომიტეტს ხელმძღვანელობდა.
2021 წელს მგალობლიშვილი მივლინებით საფრანგეთში, პარიზში გაემგზავრა. როგორც მივლინებასთან დაკავშირებულ დოკუმენტებში წერია, მისი ვიზიტის მიზანი ქართველი მხატვრების გამოფენაზე დასწრება და ასევე, ბათუმის შავი ზღვისა და ხელოვნების ფესტივალის სამომავლო გეგმების შესახებ საერთაშორისო მედიებთან შეხვედრებში მონაწილეობა იყო. ეს ვიზიტი 12 თებერვლიდან 14 თებერვლამდე გაგრძელდა და ბიუჯეტიდან 3 406 ლარით დააფინანსეს. ამ შემთხვევაში თანხაში შევიდა როგორც მგზავრობის, ასევე სასტუმროს და დღიური ხარჯი.
ამავე წელს, 15 ნოემბრიდან 19 ნოემბრის ჩათვლით, ვლადიმერ მგალობლიშვილი სამუშაო ვიზიტით ბარსელონაში იმყოფებოდა. ამ ვიზიტისთვის ბიუჯეტიდან 4 204 ლარი დაიხარჯა – მგზავრობის, სასტუმროსა და დღიური ხარჯი.
2019 წელს მგალობლიშვილი საქმიანი ვიზიტით ბელგიაში გაემგზავრა. აქ მან NC Comunikation International -ს მიერ ორგანიზებულ კვირეულში მიიღო მონაწილეობა. ვიზიტის ფარგლებში სამუშაო შეხვედრები კულტურული მიმართულებით ევროკავშირის რეგულაციებსა და კულტურული ორგანიზაციების მართვის პრაქტიკის შესახებ ინფორმაციის გაზიარებასაც ითვალისწინებდა.
- ილია ვერძაძის ვიზიტები
2019 წელს აჭარის უმაღლესი საბჭოს ჯანმრთელობის დაცვისა და სოციალურ საკითხთა კომიტეტის თავმჯდომარე ილია ვერძაძე საქმიანი ვიზიტით პოლონეთში – ქალაქ ვროცლავში, უკრაინაში – ქალაქ ლვოვში და ნიდერლანდებში – ჰააგაში იმყოფებოდა. ჯამში ამ ვიზიტებისთვის აჭარის უმაღლესი საბჭოს ბიუჯეტიდან 4 700 ლარი დაიხარჯა.
ილია ვერძაძე
უკრაინაში ილია ვერძაძე რეგიონული განვითარების პარტნიორობის ფორუმს დაესწრო, სადაც ევროპის რამდენიმე ქვეყნის წარმომადგენლები მონაწილეობდნენ, ჰააგაში კი ის უნდა დასწრებოდა საერთაშორისო სემინარს – „მშვიდობა და თავისუფლება ჰოლანდიას.“
ილია ვერძაძე სამუშაო ვიზიტით უკრაინაში, ლვოვში 2021 წელსაც იმყოფებოდა.
საერთო ჯამში აჭარის უმაღლესი საბჭოს წევრებმა 2019 წელს საზღვარგარეთ მივლინებებში ბიუჯეტიდან 59 792 ლარი დახარჯეს; 2020 წელს – 14 000-მდე ლარი; 2021 წელს, პანდემიის პირობებში, 32 692 ლარი დაიხარჯა; 2022 წლის მაისის ჩათვლით მონაცემებით კი 2 358 ლარით უმაღლესმა საბჭომ დავით თედორაძეს მალტაში ვიზიტი დაუფინანსა.
____________
მთავარ ფოტოზე: დავით გაბაიძე კრაკოვში. ფოტო: აჭარის უმაღლესი საბჭო/facebook
