პოლონეთის პრეზიდენტმა, ანჯეი დუდამ, უკრაინელ ჟურნალისტებთან ახლახან რუსეთის უკრაინაში შეჭრამდე ზელენსკისთან დაკავშირებულ თავისი შიშებზე ისაუბრა. დუდას თქმით, მას ეშინოდა, რომ 2022 წლის 23 თებერვალს ზელენსკისთან შეხვედრა ბოლო იქნებოდა.
პოლონეთის პრეზიდენტმა აღნიშნა, რომ არავინ იცოდა რა მოხდებოდა და სადამდე წავიდოდა მოსკოვი.
ანჯეი დუდამ ახლახან ისაუბრა იმაზე, თუ რატომ ჩავიდა უკრაინაში 2022 წლის 23 თებერვალს. მან აღნიშნა, რომ ლიეტუველ კოლეგასთან, გიტანას ნაუსედასთან ერთად სურდა უკრაინისადმი ღია მხარდაჭერა გამოეხატა.
„23 თებერვალს მე კიევში წავედი პრეზიდენტ გიტანოს ნაუსედასთან ერთად, რათა გვეჩვენებინა, რომ მხარს ვუჭერთ უკრაინას და პრეზიდენტ ვოლოდიმირ ზელენსკის“, – თქვა დუდამ ეროვნული ტელემარათონის ეთერში.
მისი თქმით, მაშინ ის შიშობდა, რომ ზელენსკის ბოლოჯერ ხედავდა.
„ვაღიარებ, ვფიქრობდი, რომ შეიძლება მას ბოლოჯერ ვხედავდი. შიშმა ამიტანა, როცა ჩვენ მას ვემშვიდობებოდით. სწორედ მაშინ მან თავად თქვა, რომ ეს შეიძლება იყოს ჩვენი ბოლო შეხვედრა. ჩემთვის ძალიან ამაღელვებელი იყო, როდესაც ჩვენ აპრილში ისევ შევხვდით ერთმანეთს.
მაშინ ჩვენ გვეშინოდა, რადგან მან თქვა, რომ არ წავა კიევიდან, არ დატოვებს უკრაინას და ბოლომდე აქ იქნება. არავინ იცოდა, რა მოხდებოდა. არავინ იცოდა, რა მასშტაბის იქნებოდა რუსული აგრესია, ამიტომ ჩვენი შიშები მართლაც დიდი იყო. თუმცა იმ მომენტში ჩვენ მასთან ერთად გვინდოდა ყოფნა“, – განაცხადა პოლონეთის პრეზიდენტმა.
რუსეთის უკრაინაში შეჭრის წინა დღეს, 2022 წლის 23 თებერვალს, პოლონეთის და ლიეტუვას პრეზიდენტები – ანჯეი დუდა და გიტანოს ნაუსედა კიევში ჩავიდნენ და ვოლოდიმირ ზელენსკისთან ერთად ხელი მოაწერეს უკრაინის ევროკავშირში გაწევრიანების მხარდაჭერის დეკლარაციას, ასევე შეთანხმდნენ, რომ ერთობლივად გასცემდნენ პასუხს რუსეთის მიერ უკრაინის ოკუპირებული ტერიტორიების – ფსევდორესპუბლიკების „დამოუკიდებლობის“ აღიარებას.
