უკრაინის ტერიტორიაზე რუსეთის სრულმასშტაბიანი შეჭრის პირველი დღეებიდანვე ქალაქი სუმი და მის ახლომახლო მდებარე სხვა დასახლებები საჰაერო და სარაკეტო თავდასხმების სამიზნედ იქცა.
ქალაქ სუმის მცხოვრებლებმა ამ ბრძოლებში განსაკუთრებული გამძლეობა და სიმამაცე გამოიჩინეს. დაიღუპნენ მებრძოლები, მშვიდობიანი მოქალაქეები და სამხედრო ექიმები, რომლებიც უკრაინის მცველების ჯანმრთელობაზე ზრუნავდნენ ბრძოლის ველზე.
2022 წლის 24 თებერვალს მე-15 მოტორიზებული ქვეითი ბატალიონის მთავარი სამხედრო ექიმი, სერჟანტი ინა დერუსოვა, შვებულებიდან სამსახურში ბრუნდებოდა – იგი მორიგე იყო სამხედრო სამედიცინო განყოფილებაში. ორი დღით ის ახტირკაში შეყოვნდა, რადგან მშვიდობიან ქალაქზე რუსმა სამხედროებმა მასობრივი შეტევა დაიწყეს.
ამ ადგილას მობილიზებული იყო ოპერატიული სარდლობა „სევერის“ ქვედანაყოფები, რომლის ბევრი წევრიც მძიმედ დაიჭრა რუსეთის არმიის თავდასხმებისას. სწორედ მათ დასახმარებლად დარჩა დერუსოვა ახტირკაში ბოლომდე. სიცოცხლის რისკის ფასად ექიმმა ათზე მეტი სამხედრო გადაარჩინა.
26 თებერვალს იგი ბოლოჯერ დაეხმარა დაჭრილებს რუსული ცეცხლის ქვეშ. სერჟანტი ინა დერუსოვა ამ დღეს შეეწირა რუსულ აგრესიას.
ინა დერუსოვა, უკრაინის პირველი გმირი ქალი, რომელმაც ეს წოდება ომში დაღუპვის შემდეგ მიიღო
ინამ ტერნოპოლის სახელმწიფო უნივერსიტეტი დაამთავრა.
„მას 2015 წლიდან ვიცნობდი. ერთად ვმსახურობდით. ჩვენს ბატალიონში მობილიზაციის მესამე ტალღის დროს მოვიდა და სამხედრო სამედიცინო დანაყოფში მსახურობდა. სიტუაცია მაშინ ძალიან დაძაბული იყო და მძიმე შრომა დააწვა ინას მხრებზე – ერთდროულად იყო დანაყოფის სამედიცინო სამსახურის, სამედიცინო ცენტრის უფროსი და სამედიცინო ინსტრუქტორიც. ბევრი საქმის გამო არასდროს წუწუნებდა.
მფარველი ანგელოზივით იყო მებრძოლებისთვის, ყველას უყვარდა და დედას ეძახდნენ,“- ამბობს ინას კოლეგა და თანამებრძოლი პიოტრ ლისენკო უკრაინის თავდაცვის ძალების საინფორმაციო გამოცემასთან – Aryinform-თან.
იგი იხსენებს ასევე იმასაც, რომ ინას ხელში გაიარა არაერთმა ექიმმა, რომლებმაც დატოვეს სამოქალაქო მედიცინა და ომში წავიდნენ, სამხედრო სამედიცინო დანაყოფებს რომ დახმარებოდნენ:
„უნდა გენახათ, დაბნეული გოგოები ინას დახმარებით სულ რაღაც ორ კვირაში როგორ იქცეოდნენ ნამდვილ სამხედრო, მებრძოლ მედიკოსებად.
ინა სულ მათ ირგვლივ ტრიალებდა.
ძალიან ამაყობდა შვილით, საშათი, რომელმაც 2016 წელს კონტრაქტით დაიწყო სამხედრო კარიერა იმ დანაყოფში, სადაც დედა მსახურობდა. ომამდე საშას სულ სხვა ინტერესები ჰქონდა, ხელოვნებით იყო გატაცებული, ტატუირება იყო მისი საყვარელი საქმე, მაგრამ სამხედრო სამსახურში მისვლიდან ერთ წელიწადში ის ბატალიონის ერთ-ერთი საუკეთესო ნაღმმტყორცნი გახდა, მერე საშა მალევე დაქორწინდა, რითაც ინა ძალიან ბედნიერი იყო“ – ამბობს ლისენკო.
უკრაინის მცველია ინა დერუსოვაც ძმაც, რომელიც 2014 წლიდან „კრივბასის“ ბატალიონის მოხალისე იყო, ახლა კი ის მშობლიური ქალაქის, კრივოი როგის ტერიტორიული თავდაცვის რიგებში იბრძვის.
52 წლის ინა დერუსოვა 2022 წლის 26 თებერვალს დაიღუპა რუსული ჯარების საარტილერიო დაბომბვის დროს, სწორედ მაშინ, როცა დაჭრილებს ეხმარებოდა.
ვოლოდიმირ ზელენსკიმ ინა დერუსოვას 2022 წლის 12 მარტს უკრაინის გმირის წოდება მიანიჭა.
პრეზიდენტმა ვიდეომიმართვაში აღნიშნა, რომ ინა უკრაინის პირველი გმირი ქალია, რომელსაც ეს წოდება სიკვდილის შემდეგ მიენიჭა.
________________________________
წყარო: უკრაინის თავდაცვის ძალების საინფორმაციო გამოცემა Aryinform.
