ბათუმი,მთავარი,მთიანი აჭარა,სიახლეები

ბარცხანის პლაჟი აღარ არსებობს – ხელოვნური კუნძულის მშენებლობა ბათუმში | ფოტო

31.01.2023 • 4081
ბარცხანის პლაჟი აღარ არსებობს – ხელოვნური კუნძულის მშენებლობა ბათუმში | ფოტო

ბათუმში, ბარცხანის სანაპიროსთან, ზღვის 12,5 ჰექტარ ტერიტორიას ხმელეთად გადააქცევენ. ეს ადგილი შემდგომში ერთ-ერთი ხელოვნური ნახევარკუნძული იქნება იმ პროექტის ფარგლებში, რომლითაც აქ კომპანია „ამბასადორი ბათუმი აილენდი“ ხელოვნური კუნძულის აშენებას გეგმავს.

აღნიშნული პროექტი მთლიანად გააქრობს ბარცხანის პლაჟს. მიმდინარე სამუშაოების გამო, ფაქტობრივად, პლაჟი აქ უკვე აღარ არსებობს – „ამბასადორმა“ შეიტანა ლოდები და სხვა ინერტული მასალა, რომელსაც ზღვაში ყრიან.

ბარცხანა – ხელოვნური კუნძულის მშენებლობის მიზნით აქ შეტანილი ლოდების გამო ბარცხანის სანაპიროსთან ბუნებრივი პლაჟი აღარ არსებობს. 31.01.2023 წ. ფოტო: „ბათუმელები“/გურამ მურვანიძე

ბარცხანა – ხელოვნური კუნძულის მშენებლობა. 31.01.2023 წ. ფოტო: „ბათუმელები“/გურამ მურვანიძე

ბარცხანის სანაპიროს გასწვრივ, ოფიციალურად, „ნაპირდამცავი ჯებირის“ მშენებლობა მიმდინარეობს. ეს ჯებირი კი მთლიანად შთანთქავს ბარცხანის პლაჟს.

„ამბასადორი ბათუმი აილენდის“ იურისტმა, გოჩა კამკიამ დაახლოებით 6 თვის წინ განაცხადა, რომ „საინვესტიციო პროექტი კუნძულთან ერთად გულისხმობს ხელოვნური პლაჟის შექმნასაც, რომელიც საჯარო სივრცე იქნება“.

ბათუმის ხედი ბარცხანის პლაჟიდან. 31.01.2023 წ. ფოტო: „ბათუმელები“/გურამ მურვანიძე

ბათუმის ხედი ბარცხანის პლაჟიდან. 31.01.2023 წ. ფოტო: „ბათუმელები“/გურამ მურვანიძე

უშუალოდ ხელოვნური კუნძულის მშენებლობაზე ნებართვის მისაღებად შესაბამისი პროცედურები „ამბასადორს“ ამ დრომდე არ დაუწყია.

ბარცხანა – ტროტუარიდან პლაჟზე ჩასასვლელი კიბე, რომელმაც თავისი ადრინდელი ფუნქცია უკვე დაკარგა პლაჟის გაქრობის გამო. 31.01.2023 წ. ფოტო: „ბათუმელები“/გურამ მურვანიძე

ბარცხანა – პროექტის ფარგლებში შეტანილი ქვები სანაპიროზე. 31.01.2023 წ. ფოტო: „ბათუმელები“/გურამ მურვანიძე

ბარცხანის პლაჟის გასწვრივ ზღვაში ჩასაყრელად საჭირო ქვებს, როგორც შესაბამის დოკუმენტებში იყო აღნიშნული, ძირითადად ხალას, ახალშენისა და ქედის კარიერებიდან შემოიტანენ.

ბარცხანა. 31.01.2023 წ. ფოტო: „ბათუმელები“/გურამ მურვანიძე

ბარცხანა – ქვების შეტანა სანაპიროს 1 კილომეტრი სიგრძის მონაკვეთში მიმდინარეობს.  31.01.2023 წ. ფოტო: „ბათუმელები“/გურამ მურვანიძე

ბათუმში „ხელოვნური კუნძულის“ პროექტის პრეზენტაცია 3 სექტემბერს გაიმართა. ეკონომიკის მინისტრმა, ლევან დავითაშვილმა, პრეზენტაციაზე ხაზი გაუსვა იმას, რომ „მშენებლობის ნებართვა“ კომპანიამ უკვე მიიღო, თუმცა არ დააკონკრეტა, რა სახის ნებართვაზე იყო საუბარი.

საქართველოს ეკონომიკისა და მდგრადი განვითარების სამინისტროდან 4 თვის წინ კი მოგვწერეს, რომ:

„სსიპ „ტექნიკური და სამშენებლო ზედამხედველობის სააგენტოს“ მიერ 2022 წლის 1-ელ სექტემბერს გაცემულია ნებართვა ქალაქ ბათუმში, ოდისეი დიმიტრიადის ქუჩის მიმდებარედ, შავი ზღვის აკვატორიაში ხელოვნური კუნძულის/ნახევარკუნძულის მოწყობასთან დაკავშირებულ ნაპირსამაგრი ჯებირის, როგორც განსაკუთრებული მნიშვნელობის ობიექტის, მშენებლობაზე“.

__________________________

ამავე თემაზე:

https://batumelebi.netgazeti.ge/news/438317/

 

გადაბეჭდვის წესი


ასევე: