24 მაისს მათემატიკის გამოცდაზე 42 700-ზე მეტი მოსწავლე გამოცხადდა. შეფასებისა და გამოცდების ეროვნული ცენტრის ინფორმაციით, მათგან ზღვარი წარმატებით დაძლია მონაწილეთა 86 პროცენტზე მეტმა. ივა მინდაძის შეფასებით, გამოცდებზე ტექნიკური ხარვეზები არ ყოფილა.
დღეს, 25 მაისს, არაქართულენოვანი სკოლების მოსწავლეები საატესტატო გამოცდას ქიმიაში აბარებენ, ივა მინდაძის განცხადებით, საბოლოო შედეგები გამოცდების დასრულების შემდეგ, რამდენიმე დღეში იქნება ცნობილი. მისივე ინფორმაციით, ჩაჭრილებს შორის ის მე-12 კლასელებიც არიან, ვინც გასულ წელს ვერ ჩააბარეს და ამჯერად გამოცდაზე განმეორებით გავიდნენ. შეფასებისა და გამოცდების ეროვნული ცენტრი ჩაჭრილთა ზუსტ რაოდენობას ამ დროისთვის ვერ ასახელებს, თუმცა, ივა მინდაძე ამბობს, რომ გამოცდების შედეგებს დაახლოებით ასამდე მოსწავლე აპროტესტებს: „100-მდე სხვადსხვა ტიპის წერილი გვაქვს მეილზე, ზოგი ითხოვს, რომ დავუმატოთ ქულა, უფრო მეტი ითხოვს ბარიერის დაწევას, რაც ჩვენი კომპეტენცია არ არის“.
გასულ წელს, მთლიანობაში საატესტატო გამოცდა დაახლოებით 2 200-მა მოსწავლემ ვერ ჩააბარა, მიმდინარე წელს კი, მარტო მათემატიკაში ჩაჭრილთა რიცხვი დაახლოებით 5 600-ზე მეტია.
