პარტია ერთიანი ნაციონალური მოძრაობის [ენმ] ბათუმის ორგანიზაციას გიორგი კირთაძე აღარ უხელმძღვანელებს.
გიორგი კირთაძე ენმ-ის თავმჯდომარის არჩევნებამდეც აცხადებდა, რომ თუ ნიკა მელია ვერ გაიმარჯვებდა, თანამდებობას დატოვებდა, რადგან მიიჩნევს, რომ „ახალი თავმჯდომარე თავისი გუნდით უნდა მოვიდეს.“
გიორგი კირთაძე ამბობს, რომ თანამდებობა დატოვა, თუმცა პარტიაში რჩება: „ბრძოლას გავაგრძელებ. ასევე, მინდა ვთქვა, რომ წარმატებებს ვუსურვებ ახალ თავმჯდომარეს.“
გიორგი კირთაძე გამორიცხავს, რომ ახალი თავმჯდომარის მუშაობის პირობებში, შესაძლოა, აჭარის მუნიციპალიტეტებში, საკრებულოებში ფრაქციების ხელმძღვანელების შეცვლის საკითხიც დადგეს დღის წესრიგში.
ენმ-ის თავმჯდომარის არჩევამდე პირად საუბრებში ლევან ხაბეიშვილის მხარდამჭერები ბათუმის ორგანიზაციის ხელმძღვანელად ლევან ანთაძეს მოიაზრებდნენ.
ლევან ანთაძე აჭარის უმაღლესი საბჭოს წევრია ენმ-დან, ისევე, როგორც გიორგი კირთაძე.
დღეს, 30 იანვარს, ცნობილი გახდა რომ „ნაციონალური მოძრაობის“ თავმჯდომარე ლევან ხაბეიშვილი გახდა. არჩევნებში ხაბეიშვილმა 21 656 ხმა მიიღო, რაც საერთო ხმათა რაოდენობის 52.58%-ია.