26 იანვარს, დილით, რუსეთის არმიამ მასიური სარაკეტო თავდასხმის დროს უკრაინაში 55 რაკეტა გაუშვა, მათგან 47 გაანადგურა უკრაინის საჰაერო თავდაცვამ – ამის შესახებ უკრაინის შეიარაღებული ძალების მთავარსარდალმა, ვალერი ზალუჟნიმ განაცხადა.
მისი თქმით, ოკუპანტებმა რაკეტები თვითმფრინავებიდან და შავი ზღვის აკვატორიიდან, გემებიდან გაუშვეს. 47-დან 20 რაკეტა კიევის ოლქში ჩამოაგდეს. „რუსების მიზანი უცვლელია – ფსიქოლოგიური ზეწოლა უკრაინელებზე და კრიტიკული ინფრასტრუქტურის განადგურება. მაგრამ ჩვენ ვერ გაგვტეხენ! მადლობა სამხედროებს, რომლებსაც უჭირავთ ცა უკრაინის თავზე,“ – წერს ზალუჟნი ტელეგრამზე.
საჰაერო განგაში უკრაინაში დღეს 4 საათის განმავლობაში გაგრძელდა.
განახლებული ინფორმაცია: უკრაინული მედიის ცნობით, 26 იანვარს, რუსეთის მიერ განხორციელებული სარაკეტო დარტყმების შედეგად უკრაინაში მინიმუმ 11 ადამიანი დაიღუპა.