ომის შესწავლის ამერიკული ინსტიტუტი (ISW) 25 იანვრის ანგარიშში ბოლო დღეებში რუსეთის მცირე ძალებით შეტევებზე წერს ფრონტის სამხრეთ-აღმოსავლეთ სექტორში, ზაპოროჟიესა და დონეცკის ოლქებში.
ანალიტიკოსები მიიჩნევენ, რომ ეს შესაძლოა იყოს უკრაინული ძალების ფრონტის ხაზის გასწვრივ გაშლის, ყურადღების გადატანის მცდელობა, რაც შექმნის პირობას ძირითადი შეტევისთვის ჩრდილოეთით, ლუგანსკში.
ანგარიშში აღნიშნულია, რომ უკრაინის ოფიციალური პირების თქმით, ამ თავდასხმებს ახორციელებენ მცირე ჯგუფები და ეს მიზნად ისახავს უკრაინის თავდაცვითი ხაზის დაშლას.
ანალიტიკოსები წერენ, რომ ამ შეზღუდული შეტევების პარალელურად, ბახმუტის ირგვლივ, როგორც ჩანს, „ვაგნერის“ ხელმძღვანელობით მიმდინარე ოპერაციის ტემპი ნელდება.
„ვაგნერის ჯგუფმა ვერ შეასრულა დაპირება ბახმუტის აღების შესახებ და ვერ შეძლო წინსვლა, გარდა უმნიშვნელო ტაქტიკური მიღწევებისა სოლედარში და სხვა მიმდებარე, მცირე დასახლებებში. ამიტომ, რუსეთის შეიარაღებული ძალების სამხედრო ხელმძღვანელობამ შესაძლოა გადაწყვიტა პრიორიტეტის მოხსნა ბახმუტის ოპერაციისთვის, გააცნობიერა რა იმის მცირე შესაძლებლობა, რომ ვაგნერს ნამდვილად შეუძლია დასახლების აღება,“ – წერს ISW-ი.
ISW-ის ანალიტიკოსები ანგარიშში აღნიშნავენ, რომ უკრაინელმა ოფიციალურმა პირებმა აღიარეს უკრაინული ძალების მიერ სოლედარიდან გასვლა. ასევე, ანგარიშში აღნიშნულია, რომ უკრაინულმა ძალებმა, სავარაუდოდ, მიაღწიეს წინსვლას კრემინის გარშემო.
