ნეტგაზეთი • RU

გვალვა თურქეთში – ექსპერტები ამბობენ, რომ წელს ქვეყანაში წყლის დეფიციტი იქნება

თურქეთში, იზმირის პროვინციაში, გვალვის შედეგად კაშხლებზე წყლის დონემ დაიწია. სპეციალისტები ამბობენ, რომ წელს თურქეთში კლიმატის ცვლილებებით გამოწვეული გვალვის შედეგად წყლის დეფიციტია მოსალოდნელი.

თურქული გამოცემა „დეილი საბაჰი“ წერს, რომ წელს იზმირში ჰაერის ტემპერატურა, წინა წლებთან შედარებით, 3 გრადუსით მაღალი იყო. გარდა ამისა, მნიშვნელოვნად შემცირდა წვიმიანი დღეების და კვადრატულ მეტრზე ნალექის რაოდენობა.

იზმირის პროვინციაში წვიმიანი დღეების რაოდენობა, რომელიც დეკემბერში საშუალოდ 13 იყო, 6-7 დღემდე შემცირდა.

კლიმატის ექსპერტი, პროფესორი დოღან იაშარი იზმირის დოკუზ ეილულის უნივერსიტეტიდან ამბობს, რომ მოცემული სიტუაცია მიუთითებს, რომ ამ ზაფხულში თურქეთში წყლის მწვავე დეფიციტი იქნება.

„ძალიან ძლიერი გვალვაა. ტბები დაშრა და უდაბნოებს დაემსგავსა. 50-ზე მეტი ტბა და ჭაობი დაშრა… მიწისქვეშა წყლები ჭაობებითა და ტბებით იკვებებიან, ჩვენ ვერ ვმართავდით წყალს და შემდეგ ეს კლიმატის ცვლილებას დავაბრალეთ.

ჩვენ წელს გვქონდა ყველაზე ცხელი და უნალექო დეკემბერი და იანვარი ბოლო 52 წლის განმავლობაში. ნოემბერი, დეკემბერი, იანვარი და თებერვალი კაშხლებისთვის ძალიან მნიშვნელოვანი თვეებია, მაგრამ იანვრის ბოლოს მივედით და ჯერ არაფერია. ეს სერიოზული პრობლემაა და ამას ზაფხულში წყლის დეფიციტი მოჰყვება, შესაბამისად – სერიოზული სასოფლო-სამეურნეო გვალვა,“ – ციტირებს „დეილი საბაჰი“ პროფესორს.

მაღალი ტემპერატურა და წვიმიანი დღეების რაოდენობის შემცირება  წყლის დონეზეც აისახა იმ კაშხლებზე, რომლებიც უზრუნველყოფენ იზმირის სასმელი წყლით მომარაგებას.

იზმირის წყლისა და კანალიზაციის ადმინისტრაციის მონაცემებით, ქალაქის ყველაზე მნიშვნელოვანი სასმელი წყლის წყაროს, ტაჰტალის კაშხლის მაჩვენებელი გასული წლის ანალოგიურ პერიოდში 54,33% იყო და ახლა 39,95 პროცენტია. ბალჩოვას კაშხალი, რომელიც გასული წლის ანალოგიურ პერიოდში 46,96%-ით იყო სავსე, ახლა წყალი 29,28%-მდე შემცირდა, ურქმეზის კაშხალზე – 75,1%-დან 39,26 პროცენტამდე და ა.შ.

ჰაერის ტემპერატურის მატება აღინიშნება სტამბოლშიც, სადაც იანვარში ხეები აყვავდა.

ამავე თემაზე: 

სტამბოლში ხეები იანვარში აყვავდა – რა მოყვება „ცრუ გაზაფხულს“

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com