დღეს, 25 იანვარს, ბათუმის რუსთაველის სახელმწიფო უნივერსიტეტში პირველი რექტორის, ხუსეინ ნაკაიძის ბიუსტი გახსნეს.
ხუსეინ ნაკაიძე საბჭოთა რეჟიმის მსხვერპლი იყო. 1938 წელს ის აუდიტორიიდან გაიყვანეს და „ხალხის მტრის“ ბრალდებით დახვრიტეს.
მასთან ერთად დახვრიტეს ორი დეკანიც, რომლებიც ხუსეინ ნაკაიძეს გამოესარჩლნენ დაკავებისას.
როგორც დღეს უნივერსიტეტში აღნიშნეს, ხუსეინ ნაკაიძეს დიდი წვლილი მიუძღვის მაშინდელი ბათუმის სამასწავლებლო, ორწლიანი ინსტიტუტის ჩამოყალიბებაში, თუმცა ის მხოლოდ პირველ გამოშვებას მოესწრო.
ხუსეინ ნაკაიძე 1905 წელს დაიბადა, ადრე დაობლდა და დედის ბაბუის, ილია ჭავჭავაძის თანამოაზრის, გულო კაიკაციშვილის ოჯახში იზრდებოდა, ქობულეთში.
საარქივო წყაროების მიხედვით, ხუსეინ ნაკაიძე ქობულეთის ორკლასიან სასწავლებელში 1913 წელს მიაბარეს.
იგი 1914 წელს, „ქართველთა შორის წერა-კითხვის გამავრცელებელი საზოგადოების“ ინიციატივით, ცნობილი მეცენატი ძმების, ზუბალაშვილების სტიპენდიით ქუთაისის კლასიკურ გიმნაზიაში ჩაირიცხა, 1918 წელს კი ბათუმის ქართულ გიმნაზიაში გადმოიყვანეს.
1924 წელს ხუსეინ ნაკაიძემ ჯერ ბათუმის ჰუმანიტარული ტექნიკუმი დაამთავრა, შემდეგ კი თბილისის სახელმწიფო უნივერსიტეტის ფილოლოგიის ფაკულტეტზე ჩაირიცხა.
მუშაობდა აჭარის სახალხო განათლების კომისრად, კომისართა საბჭოსთან არსებული ხელოვნების კომიტეტის თავმჯდომარედ, ბოლოს კი ახლად გახსნილი სამასწავლებლო ინსტიტუტის [ამჟამინდელი ბათუმის შოთა რუსთაველის უნივერსიტეტი] დირექტორად დანიშნეს.
ხუსეინ ნაკაიძის ოჯახის წევრები ბიუსტის გახსნაზე ბსუ-ში
სასწავლო გეგმებისა და სამეცნიერო საქმიანობის ხელშეწყობის გარდა, ხუსეინ ნაკაიძე მონაწილეობდა ინსტიტუტის ბიბლიოთეკისა და შენობის მოწესრიგებაში, ეზოსა და სტუდენტთა საერთო საცხოვრებლის კეთილმოწყობაში.
„განსაკუთრებით გულშემატკივრობდა სტუდენტებს, ინტერესდებოდა მათი ცხოვრების პირობებით, კვებით, ჯანმრთელობით, ბევრს მატერიალურად უმართავდა ხელს. ხშირად სტუმრობდა იმხანად ინსტიტუტის ეზოში განთავსებულ სტუდენტთა ქსენონს და სტუდენტებისთვის საკვები და წამლები მიჰქონდა“ – იუწყება ბსუ.
