ბათუმის საკრებულო ლუკა ასათიანის ბათუმის ქალაქისთავად არჩევის დღის აღნიშვნას გეგმავს.
საკრებულოს ბიურომ უკვე განიხილა განკარგულების პროექტი, რომლითაც მერს დაევალება შესაბამისი ღონისძიებების დასაფინანსებლად ბიუჯეტიდან თანხა გამონახოს.
ინიციატორი საკრებულოს განათლებისა და კულტურის კომისიაა. პროექტის განმარტებით ბარათში კომისიის თავმჯდომარე წერს ლუკა ასათიანის ღვაწლზე ბათუმისთვის და მისი ღვაწლის წარმოჩენის მიზნით ღონისძიების დაგეგმვის აუცილებლობაზე:
„მოგეხსენებათ, 128 წლის წინ, 1895 წლის 25 იანვარს, ბათუმმა აირჩია პირველი ქალაქისთავი ლუკა ასათიანი, რომლის მოღვაწეობამაც უდიდესი კვალი დააჩნია ბათუმის განვითარებას. ფაქტობრივად არ ყოფილა რომელიმე სფერო, რომელზეც ლუკას თავისი ხელი არ დაედო. დიდია მისი ღვაწლი ბათუმის განაშენიანების საქმეში. განსაკუთრებით აღსანიშნავია ქალაქის მიმდებარე ტერიტორიებზე ჭაობის ამოშრობა, კაპიტალურად გაყვანილი სანიაღვრე კანალიზაციის არხები [მათ შორის ჟილინსკისა და ივანოვის არხები], რომლებმაც მთელი ქალაქი გადაკვეთეს.
პარალელურად წარმოებდა ქალაქის დადაბლებული ადგილების ხრეშითა და გრუნტით მოზვინვა. ყოველივე ამან განაპირობა ქალაქში ჭაობიანი ადგილების დაშრობა და მეტად საშიში ავადმყოფობის მალარიის მოსპობა. შედეგად შესაძლებელი გახდა ახალი ქუჩების გაყვანა და ნაწილის კეთილმოწყობა.
ლუკა ასათიანის პირადი ინიციატივით დაიწყო ბათუმის საბჭოს შენობის აგება, რომელშიც დღეს მუნიციპალიტეტის ადმინისტრაციაა განთავსებული.
მისივე მმართველობის პერიოდშია აშენებული ახლანდელი რესპუბლიკური საავადმყოფო, რომელიც აჭარის მოსახლეობას დღესაც ემსახურება. ლუკა ასათიანი, ილია ჭავჭავაძესთან ერთად, დიდ ყურადღებას უთმობდა ბათუმში განათლების აღმავლობის საქმეს. მისი ინიციატივით ქალაქში უმოკლეს ვადაში ყველა ეროვნებისათვის მათ ენაზე დაწყებითი კლასები გაიხსნა“.
ბათუმის პირველი ქალაქისთავი – ლუკა ასათიანი
წინა მოწვევის საკრებულო ბათუმის საკრებულოს სხდომათა დარბაზში, რომელსაც ლუკა ასათიანის სახელი უწოდეს, მისი პორტრეტის განთავსებასაც გეგმავდა. საკრებულო დაინტერესებული იყო, თუ რა ბედი ეწია ლუკა ასათიანის იმ პორტრეტს, რომელიც „1901 წელს ბათუმის სათათბიროს სააქტო დარბაზში თვალსაჩინო ადგილზე გამოუფენიათ“, თუმცა რა გამოარკვიეს, ამ დრომდე არ ვიცით.
„ჩვენ ვეცადეთ, გაგვერკვია ამ პორტრეტის ბედი, თუმცა ჯერჯერობით ხელმოსაჭიდ წყაროებს ვერ მივაკვლიეთ“, – განაცხადეს მაშინ ბათუმის საკრებულოში.
