შუახევისა და ქედის მუნიციპალიტეტებში საჯარო სკოლები სკოლის ექიმებსა და ექთნებს ვერ პოულობენ.
2022 წლის 21 მარტს საქართველოს განათლების და ჯანდაცვის მინისტრებმა გამოსცეს ერთობლივი ბრძანება, რომლის თანახმადაც განისაზღვრა სკოლებში სამედიცინო პერსონალის საქმიანობის სტანდარტი. ეს სტანდარტი სკოლაში ექიმის ან ექთნის ყოფნას და სამედიცინო პერსონალისთვის სივრცის ან შესაბამისი კაბინეტის გამოყოფას ითვალისწინებს.
შუახევში 43 საჯარო სკოლაა. მუნიციპალიტეტის რესურსცენტრის ხელმძღვანელის, ედუარდ გოგრაჭაძის თქმით, დაახლოებით 38 საჯარო სკოლაში უკვე მოხერხდა ექთნებისა და ექიმების აყვანა, მათთვის საჭირო სივრცეების მოწყობა, დანარჩენ სკოლებში კი მიმდინარეობს კონკურსი და საჭიროა სივრცეების მოწყობა.
„ძირითადად ექთნები ავიყვანეთ, რა თქმა უნდა, იმიტომ, რომ მცირე კონტინგენტიანი სკოლები გვაქვს.
სკოლები 50 მოსწავლეზე ქვემოთ – ექთნის აყვანას ითვალისწინებს. დაახლოებით 10-მდე სკოლა გვქონდა, სადაც ექიმის შტატი დაიშვა, თუმცა უმრავლესობაში ექიმის კადრი ვერ შეირჩა იმიტომ, რომ არ არის ამდენი ექიმი მუნიციპალიტეტში. ოთხ სკოლაში ავიყვანეთ ექიმი, მაგრამ ნაწილში ექთნის შტატად გადაკეთება მოგვიწია დროებით, რა თქმა უნდა, სანამ ექიმი შეირჩევა.
[სკოლებში] სამედიცინო პუნქტი შეიძლება მოეწყოს ნებისმიერ ოთახში, ან კუთხე შეიძლება მოეწყოს. რაღაც კაბინეტური ტიპის სივრცის მოწყობის აუცილებლობა არ არის, რაც, ასე რომ ვთქვათ, სპეციალურ ინფრასტრუქტულ სამუშაოებს ითვალისწინებს. [ექიმის] კაბინეტი საჭიროა იქ, სადაც ექიმია“, – ამბობს ედუარდ გოგრაჭაძე.
როგორც მან გვითხრა, იანვრიდან სკოლაში დასაქმებული ექთნების ხელფასი 550, ხოლო ექიმების – 660 ლარი იქნება.
ექიმის აყვანა უჭირთ ქედის სკოლებშიც. აქ სულ 29 საჯარო სკოლაა. მუნიციპალიტეტის რესურსცენტრის ხელმძღვანელისგან, დურმიშხან შავიშვილისგან ვიგებთ, რომ ქედის 3 საჯარო სკოლას ფართობის პრობლემა შეექმნა და აქამდე ამიტომ ვერ მოახერხეს ექიმის/ექთნის მუშაობისთვის საჭირო სივრცის მოწყობა სკოლებში, დანარჩენ 26 სკოლაში კი სივრცე უკვე მოეწყო, მაგრამ ამ სკოლებიდან 4 სკოლამ ვერ აიყვანა თანამშრომელი.
„მაგალითად, გამოცხადებული იყო რამდენჯერმე ვაკანსია ექიმის პოზიციაზე, ვერ ავიყვანეთ ექიმი და განათლებისა და მეცნიერების სამინისტროს მივწერეთ წერილი დაგვთანხმებოდა ექთნის აყვანაზე. დაგვიდასტურეს და ახლა ვაკანსიას ექთნის პოზიციაზე გამოვაცხადებთ“, – ამბობს დურმიშხან გოგრაჭაძე. მისი თქმით, ექიმის აყვანა მუნიციპალიტეტის მხოლოდ 1 საჯარო სკოლაში მოხერხდა.
„ექიმები ფიზიკურად არ არიან ადგილზე. ვინც არის, ფიზიკურად სხვაგან ცხოვრობენ, არა მგონია ამისთვის მოვიდნენ. ექთნები არიან და მათ შორის კი იმართება კონკურსები.
ისინი ვალდებულები არიან სკოლაში იყვნენ სასწავლო პროცესისას“, – ამბობს დურმიშხან შავიშვილი.
ამ ეტაპზე ხულოს მუნიციპალიტეტის არც ერთ სკოლას არ აუყვანია ექიმი ან ექთანი. მუნიციპალიტეტში სულ 49 საჯარო სკოლაა.
ხულოს რესურსცენტრის ხელმძღვანელი ედუარდ მიქელაძე ჩვენთან საუბრისას ამბობს, რომ ხულოს 9 სკოლაში უკვე მზადაა სკოლის ექიმის კაბინეტი და სკოლები ეტაპობრივად აცხადებენ ვაკანსიებს ექიმის და ექთნის პოზიციაზე. მისი თქმით, მუნიციპალიტეტის ყველა საჯარო სკოლა მარტის ბოლომდე შეძლებს სამედიცინო პერსონალის ოთახის მოწყობასა და თანამშრომლების აყვანას.
________________
ფოტო „ბათუმელების“ არქივიდან
