ნეტგაზეთი • RU

საგარეჯოში 5 ადამიანი მოკლეს, მათ შორის 1 პოლიციელია, დაჭრილია – 5 პირი

20 იანვრის ღამეს, საგარეჯოში 48 წლის ყოფილმა სამხედრომ ცეცხლსასროლი იარაღიდან გასროლით 5 ადამიანი მოკლა, 5 კი დაიჭრა. გარდაცვლილია პოლიციის ლეიტენანტი ოთარ ღვინაშვილი, ერთი პოლიციელი კი მძიმედ არის დაჭრილი. თვითმხილველების თქმით, კაცმა ესროლა სასწრაფოს ექიმებსაც.

როგორც შს მინისტრი ვახტანგ გომელაური ამბობს, ყოფილმა სამხედრომ სროლა სახლის აივნიდან დაიწყო.

„მოქალაქემ ავტომატური ცეცხლსასროლი იარაღიდან დაიწყო სროლა სახლიდან. სახლში მისი სრულწლოვანი შვილი იმყოფებოდა. ჯერ აივნის ერთი მხრიდან დაიწყო სროლა, შემდეგ მეორე მხრიდან, შვილმა დატოვა სახლი.

პოლიციელის თანამშრომლები რომ მივიდნენ გახსნა ცეცხლი და დაიღუპა ერთი პოლიციელი“, – ამბობდა გომელაური.

ყოფილმა სამხედრომ სამსახური 2021 წელს დატოვა. ის ავღანეთის მისიაშიც მსახურობდა. „რა მოხდა არავინ იცის ჯერჯერობით“, – ამბობს გომელაური.

მისი თქმით, როდესაც სპეცდანიშნულების წევრები ოთახში შევიდნენ, აღნიშნულ პირს თავიდან სისხლი მოსდიოდა. „გვერდით ედო ცეცხლსასროლი იარაღი, ხელყუმბარის რგოლები, რამდენიმე ცალი ქვეშ ჰქონდა ამოდებული, ამოვიდნენ გამნაღმველებიც და დაათვალიერეს ხელყუმბარა“, – ამბობს გომელაური.

მინისტრს ამ დროისთვის არ აქვს პასუხი კითხვებზე, თუ რა უძღოდა ამ ტრაგედიას წინ. მისი თქმით, მიმდინარეობს გამოკითხვა, მათ შორის დაღუპული ყოფილი სამხედროს შვილის, თუმცა კონკრეტული მიზეზები ამ დრომდე უცნობია.

ყოფილი სამხედრო ნოდარ ათუაშვილი 1974 წელს არის დაბადებული.

გამოძიება სისხლის სამართლის კოდექსის 109-ე მუხლის „ლ“ ქვეპუნქტით და 236-ე მუხლის მესამე ნაწილით მიმდინარეობს, რაც დამამძიმებელ გარემოებაში ჩადენილ განზრახ მკვლელობას და ცეცხლსასროლი იარაღისა და საბრძოლო მასალის უკანონო შეძენა-შენახვასა და ტარებას გულისხმობს.

__

მთავარი ფოტო: დაღუპული პოლიციელი

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com