ესტონეთის მთავრობამ დაამტკიცა უკრაინისთვის სამხედრო დახმარების პაკეტი, რომლის ღირებულებაც ჯამში 113 მილიონი ევროა.
დახმარების პაკეტში შედის რამდენიმე ათეული 155 და 122 მმ-იანი ჰაუბიცის მიწოდება შესაბამისი საბრძოლო მასალით, სატვირთო მანქანები ჰაუბიცების ტრანსპორტირებისთვის, ასევე, 100-ზე მეტი Carl Gustaf-ის ტანკსაწინააღმდეგო ყუმბარმტყორცნი და 1000-ზე მეტი ვაზნა მათთვის.
ეს არის ყველაზე დიდი სამხედრო დახმარების პაკეტი, რომელსაც ტალინი გადასცემს კიევს ომის დაწყების შემდეგ.
„ესტონელებმა თავიანთი მტკივნეული ისტორიიდან იციან, რა ხდება, როცა ბოროტება იმარჯვებს და დიდი ქვეყანა შთანთქავს პატარებს.
თუ უკრაინა დაეცემა, მსოფლიოს სხვა ქვეყნების თავისუფლებასაც დაემუქრება საფრთხე.
უკრაინისთვის დამოუკიდებლობის დაცვაში დახმარებით ჩვენ ვიცავთ ყველა ქვეყნის, მათ შორის, ესტონეთის, თავისუფლებისა და დემოკრატიის უფლებას“, – განაცხადა ესტონეთის პრემიერ-მინისტრმა კაია კალასმა.
მისივე თქმით, თავისუფალმა სამყარომ უნდა გააგრძელოს უკრაინის იარაღით დახმარება ბევრად უფრო მასშტაბურად და სწრაფად.
„რუსეთის ომს უკრაინის წინააღმდეგ აქვს ფასი, რომელსაც ჩვენ ვიხდით ევროში, მაგრამ უკრაინელები იხდიან თავიანთი სიცოცხლით,“ – თქვა ქვეყნის პრემიერ-მინისტრმა.
___________________
ფოტოზე: კაია კალასი, ესტონეთის პრემიერი/Facebook
