რუსეთში სამხედრო პატივით დაკრძალეს „ვაგნერის“ დაჯგუფების მებრძოლი, რომელიც უკრაინაში საომრად წასვლამდე ციხეში დედის მკვლელობისთვის იხდიდა სასჯელს, იუწყება „მედუზა“.
46 წლის სერგეი მოლოდცოვის დაკრძალვა 5 იანვარს, ქალაქ სეროვში შედგა. ადგილობრივი გამოცემის ცნობით, „მებრძოლის კუბო სამხედროებს მოჰქონდათ. სიტყვით გამოვიდნენ ვეტერანები, რომლებმაც მადლობა გადაუხადეს სერგეის სიმამაცისა და გმირობისთვის“.
მოლოდცოვი 2017 წელს ცნეს დამნაშავედ საკუთარი დედის ცემის გზით სიკვდილამდე მიყვანის ბრალდებით. მას 11,5-წლიანი პატიმრობა მიუსაჯეს. სასამართლოს განაჩენში ნათქვამია, რომ იგი მსგავსი ბრალდებით იქამდეც იყო ნასამართლევი.
„ვაგნერის“ დაჯგუფების ხელმძღვანელი, ევგენი პრიგოჟინი უკრაინაში ომის დაწყების შემდეგ სხვადასხვა ციხეში დადიოდა და მსჯავრდებულებს საომრად წასვლის სანაცვლოდ სამომავლო ამნისტიას სთავაზობდა.
