ხულოს რამდენიმე სოფელს ამ დროისთვის ელექტროენერგია არ მიეწოდება. „ენერგო-პრო ჯორჯიას“ ინფორმაციით, მიზეზი დიდთოვლობაა, რამაც დააზიანა ელექტროგადამცემი ხაზები.
7 იანვრის დილის 12-ის ნახევრისთვის დენი არ მიეწოდება დიოკნისის და რიყეთის თემის სოფლებს. ამ სოფლებში დენი, როგორც ადგილობრივებმა გვითხრეს, 6 იანვრის საღამოს გაითიშა. ენერგოკომპანიაში კი „ბათუმელებს“ განუცხადეს, რომ აღნიშნულ სოფლებში დაზიანების ადგილები ნაწილობრივ დადგენილია და მიმდინარეობს აღდგენითი სამუშაოები.
„სამუშაოები მიმდინარეობს ასევე სხვა დაზიანების ადგილების დასადგენად… რაც შეეხება ღორჯომის თემის სოფლებს და ასევე სოფელ ვაშლოვანს, აქ შუქი მალე ჩაირთვება“ – გვითხრეს „ენერგო-პროში“.
ხულოში ამ წუთებშიც თოვს. როგორც „ბათუმელებს“ უთხრეს, დაბა ხულოში თოვლის საფარის სიმაღლე 15-20 სანტიმეტრია, მაღალი ზონის სოფლებში და კურორტ გოდერძიზე კი, 40-50 სანტიმეტრი.
რაც შეეხება მუნიციპალიტეტის სოფლებთან მისასვლელ გზებს, „ბათუმელები“ ინფორმაციას აზუსტებს და მიღებისთანავე აქვე მოგაწვდით.
დაბა ხულო / 7.01.2022
სინოპტიკოსების ცნობით, აჭარაში 9 იანვარს ღამით და დილით მოსალოდნელია წვიმა, მთაში თოვა, დღის მეორე ნახევრიდან და მომდევნო 2 დღეს [10 და 11 იანვარს კი] მოსალოდნელია უმეტესად უნალექო ამინდი.
