მინიმუმ 3 ადამიანი დაშავდა საახალწლო პიროტექნიკით ბათუმში 31 დეკემბერს, ახალი წლის ღამეს. ერთ-ერთ მათგანს, 30 წლამდე კაცს ხელის თითის ამპუტაცია დასჭირდა, იგი ამ დრომდე კლინიკაში იმყოფება – ინფორმაცია „ბათუმელებს“ კლინიკა ბაუ-ში დაუდასტურეს.
საახალწლო პიროტექნიკით ბათუმში დაშავდა კიდევ ორი ადამიანი, თუმცა მათ მსუბუქი დაზიანებები აღენიშნებოდათ.
რამდენი ადამიანი დაშავდა საახალწლო პიროტექნიკით წელს საქართველოში, უცნობია. საგანგებო სიტუაციების კოორდინაციისა და გადაუდებელი დახმარების ცენტრში გვითხრეს, რომ ბათუმსა და მთელს საქართველოში პიროტექნიკით დაშავებულთა რაოდენობის შესახებ ინფორმაციას გამოთხოვის შემდეგ მოგვაწვდიან.
საახალწლო პიროტექნიკის გამოყენების შედეგად ყოველწლიურად არაერთი ადამიანი ზიანდება.
2022 წელს საქართველოში 5 მილიონ 816 ათას 200 აშშ დოლარის ღირებულების პიროტექნიკა შემოიტანეს. აქედან 3 მილიონ 99 ათას 900 აშშ დოლარის მარტო ფეიერვერკია.
ამავე თემაზე:
