გაერთიანებული სამეფოს დაზვერვის 30 დეკემბრის ანგარიში უკრაინაში რუსეთის დასავლეთის ძალების დაჯგუფების (WGF) სარდლობის შეცვლის შესახებ იუწყება. ანგარიშის მიხედვით, ამჯერად ამ დაჯგუფების მეთაურობას გენერალ-ლეიტენანტ ევგენი ნიკიფოროვს გადასცემენ.
როგორც ბრიტანული დაზვერვა წერს, ნიკოფოროვი სულ მცირე მეოთხე სარდალი იქნება, რომელიც აღნიშნულ ჯგუფში უკრაინაზე სრულმასშტაბიანი თავდასხმის შემდეგ შეიცვალა. იგი გენერალ-პოლკოვნიკ სერგეი კუზოვლევს შეცვლის, რომელიც სულ რაღაც სამი თვის წინ დაინიშნა ამ პოსტზე.
როგორც გაერთიანებული სამეფოს დაზვერვის ანგარიში შეგვახსენებს, ნიკიფოროვი უკრაინაში შეჭრის პირველ კვირებში რუსეთის აღმოსავლეთის ძალების ჯგუფის (EGF) შტაბის უფროსის პოზიციას იკავებდა. აღნიშნული ჯგუფი, რუსეთის საჰაერო სადესანტო ძალებთან ერთად, მიიწევდა ჩრდილო-დასავლეთიდან კიევისკენ, ჩერნობილის ტერიტორიის გავლით. ბრიტანული დაზვერვის შეფასებით, ნიკიფოროვი აქტიურად იქნებოდა ჩართული ამ კატასტროფული მოქმედებების დაგეგმვაში.
გაერთიანებული სამეფოს დაზვერვის თანახმად, თითქმის დადასტურებით შეიძლება ითქვას, რომ WGF-ს ამ დროისთვის ევალება რუსეთის მარჯვენა ფლანგის გამაგრება. ეს ფლანგი მოიცავს ლუგანსკის ოლქის ტერიტორიას კრემენაიასა და სვატოვოს ირგვლივ. ბრიტანული დაზვერვის შეფასებით, რადგანაც ამ სექტორში თავდასხმითი მოქმედებების ინიცირების შესაძლებლობა ორივე მხარეს თანაბრად, ნიკიფოროვი საკუთარ თავზე მნიშვნელოვან ოპერატიულ როლს იღებს კონფლიქტში.
უფროსი რუსი ოფიცრების მუდმივი გადანაცვლება, სავარაუდოდ ასახავს შიდა განხეთქილებას რუსეთის თავდაცვის სამინისტროს მიერ ომის წარმართვის სამომავლო ხედვებთან დაკავშირებით.
