გაერთიანებული სამეფოს დაზვერვის 21 დეკემბრის მონაცემები დონეცკის ოლქის ქალაქ ბახმუტში მიმდინარე საბრძოლო მოქმედებებს ეხება. როგორც ბრიტანული დაზვერვა წერს, გასულ კვირას „ვაგნერის“ ძალებმა მცირე წინსვლას მიაღწიეს ბახმუტის აღმოსავლეთ კიდესთან.
რუსი ქვეითები სავარაუდოდ ქალაქის აღმოსავლეთ ინდუსტრიულ ზონაში არიან გამაგრებულები და დროდადრო მიიწევენ ქალაქის საცხოვრებელი უბნებისკენ. მიმდინარეობს ქუჩის ბრძოლები.
გაერთიანებული სამეფოს დაზვერვის ანგარიშში მიმოხილულია ბახმუტის სექტორში ბრძოლების ინტენსიურ ფაზაზე გადასვლის ეტაპები. როგორც ანგარიშში ვკითხულობთ, ინტენსიური საბრძოლო მოქმედებები ბახმუტის სექტორში 2022 წლის ივნისიდან დაიწყო, თუმცა ბრძოლები ძირითადად გაშლილ ტერიტორიაზე – ქალაქის აღმოსავლეთ მისადგომების ირგვლივ მიმდინარეობდა.
ბრიტანული დაზვერვა ასევე საუბრობს დასახლებულ არეალში ფართო მასშტაბის ბრძოლებზე. როგორც ანგარიშში ვკითხულობთ, მსგავსი ბრძოლები ივლისის შემდეგ დაიწყო, ეს ის პერიოდია, როდესაც რუსებმა წინსვლას მიაღწიეს ლისინჩანსკსა და სევეროდონეცკისკენ.
თუმცა დაზვერვა იქვე აფასებს, რომ ფართო მასშტაბის ბრძოლები დასახლებულ არეალში მოითხოვს მაღალკვალიფიციურ ქვეითებს შესანიშნავად გაწვრთნილი უმცროსი დონის მეთაურებით. შესაბამისად, ნაკლებად სავარაუდოა, რომ ამ ტიპის ბრძოლები აწყობდეთ ცუდად გაწვრთნილ „ვაგნერის“ მებრძოლებს და რუსული არმიის მობილიზებულ რეზერვისტებს.
